Gunn­laugur Árni hefur lokið keppni á US Open

Gunnlaugur endar í 155. sæti á mótinu eða neðsta sæti af þeim sem spiluðu tvo fyrstu hringina. Hann var fjórum höggum á eftir næsta manni sem var Rocco Repetto Taylor frá Spáni.

Það gekk á ýmsu hjá Gunnlaugi á þessum afar krefjandi golfvelli en það voru heimsklassa kylfingar í vandræðum á Shinnecock Hills-golfvellinum.

Þetta var mikil reynsla fyrir Gunnlaug en hann sýndi styrk með því að klára síðustu níu holurnar á einu höggi yfir pari. Á síðustu níu holunum var hann með einn fugl, einn skolla og sjö pör.

Hann hafði fengið fjóra skolla og einn skramba á fyrstu níu holunum sínum í dag eftir að hafa spilað á 14 höggum yfir pari á fyrsta hringnum sem lauk ekki hjá honum fyrr en í morgun.

Í beinni textalýsingu sem finna má hér neðar í fréttinni má sjá hvernig þetta gekk allt saman fyrir sig. 

Íslendingurinn opnaði nýjan kafla í íslenskri golfsögu í gær með því að verða fyrsti íslenski kylfingurinn til þess að leika á þessu risamóti í karlaflokki.