Gleði og sorg í Bítlaborginni í gær­kvöldi: Sjáðu mörkin

Liðin úr Bítlaborginni, Liverpool og Everton, voru bæði að spila í gærkvöldi en úrslitin hjá þeim voru afar ólík.

Á meðan Everton fagnaði fyrsta heimasigri sínum á nýju almanaksári þá gengu leikmenn Liverpool enn á ný niðurlútir af velli eftir að hafa fengið á sig sigurmark í blálok leiks.

Everton vann 2-0 sigur á Burnley þökk sé skallamarki James Tarkowski eftir rúmlega hálftíma leik og marki Kiernan Dewsbury-Hall á 60. mínútu.

Rodrigo Gomes kom Wolves í 1-0 á móti Liverpool en Mohamed Salah jafnaði sjö mínútum fyrir leikslok með langþráðu marki fyrir hann í ensku úrvalsdeildinni. Í stað þess að Liverpool myndi nýta eitthvað af færum sínum í lokin þá fóru Úlfarnir upp í skyndisókn og André skoraði sigurmarkið á fjórðu mínútu í uppbótartíma.

Vítaspyrna Habib Diarra á 70. mínútu tryggði Sunderland 1-0 útisigur á Leeds United en sex mínútum fyrr höfðu myndbandsdómarar tekið mark af Leeds.

Hér fyrir ofan og neðan má sjá mörkin úr þessum leikjum.