Innlent

Enginn sinueldur og ró­leg nótt hjá slökkvi­liði eftir eril gær­dagsins

Gunnar Reynir Valþórsson skrifar
Reykurinn sást víða að í gær.
Reykurinn sást víða að í gær. Vísir/Brynjar Freyr

Nóttin var með rólegasta móti hjá slökkviliðinu á höfuðborgarsvæðinu eftir annasaman dag í gær þar sem mikill sinueldur logaði víða. Mestur bruninn varð við suðvesturhorni Elliðavatns og í átt að Heiðmörk en þar tókst að ráða niðurlögum eldsins á áttunda tímanum í gærkvöldi.

Varðstjóri hjá slökkviliðinu segir í samtali við fréttastofu að nóttin hafi svo verið með kyrrum kjörum og að engir sinueldar hafi blossað upp. Slökkviliðsmenn fóru seint í gærkvöldi ásamt lögreglumönnum og nýttu sér dróna lögreglunnar til þess að skima brunasvæði og leita að glóð.

Engin brunahreiður fundust við þá yfirferð. Slökkviliðin á höfuðborgarsvæðinu fóru í fjölmörg útköll í gær vegna sinuelda. Eftir að eldurinn við Elliðavatn hafði verið slökktur barst tilkynning um annan á Krýsuvíkurleiðinni og enn annar við Vallarhverfið í Hafnarfirði.

Slökkvilið

Tengdar fréttir

Sinueldur við Elliðavatn

Sinueldur kviknaði við suðvesturhorn Elliðavatns í Reykjavík rétt eftir klukkan þrjú í dag. Slökkviliðið réði niðurlögum eldsins um sjöleytið.

Reykur sást á flug­vallar­svæðinu

Minni háttar sinueldur kviknaði á Reykjavíkurflugvelli á ellefta tímanum og sást reykur stíga upp frá flugvallarsvæðinu. Búið er að slökkva eldinn en minnst fjórir sinueldar hafa komið upp á höfuðborgarsvæðinu á innan við sólarhring.

Mest lesið


Fleiri fréttir

Sjá meira


×

Mest lesið