Vilja minnka allt þetta nei­kvæða suð

Markús hefur nú lengi vel skapað einstök hljóðdempandi málverk sem draga úr óæskilegum tíðnum og bæta hljóðvist þeirra rýma sem þau prýða.

Hjón með suð á heilanum

Í verkum sínum sameinar hann hönnun og list, notagildi og fagurfræði og rannsakar suð í lífi fólks og hvernig það skapar sér leiðir og rútínur til að vinna gegn neikvæðu suði.

Hann og eiginkona hans, Heiðbjört Arney viðskiptafræðingur, standa á bak við Stúdíó Suð sem hefur það að markmiði að minnka neikvætt suð í lífi fólks. Það er óhætt að segja að þau séu með suð á heilanum.

„Ég hef verið að gera hljóðdempandi málverk í um tvö ár, en hugmyndin er í grunninn að skapa málverk sem eru á sama tíma ósýnileg hljóðvistarlausn. 

Ég er að tvinna saman hönnun og list. Þetta eru listaverk, en þau hafa einnig notagildi,“ segir Markús og bætir við: 

„Ég lærði að silkiþrykkja í Listaháskólanum og mig hefur lengi dreymt um að gefa út silkiprentlínu. 

Nú lét ég loks verða af því og við Heiðbjört, konan mín, settum upp lítið silkiprentverkstæði á vinnustofunni okkar.“

Seldist næstum upp á fyrsta degi

Stúdíó Suð hélt pop-up sýningu í Litla gallerí helgina 28.–30. nóvember þar sem þau kynntu til leiks ný hljóðdempandi silkiþrykkt listaverk og sló sýningin rækilega í gegn.

Þegar hurðir opnuðust seldust nær öll verkin strax á fyrsta degi og myndaðist biðröð gesta sem vildu tryggja sér verk. 

Markús vann langt fram á nótt við að búa til fleiri viðbótarverk til að mæta eftirspurninni, en þrátt fyrir þá viðleitni var allt uppselt áður en sýningarhelgin lauk.

Fólk meðvitaðra um hljóðvist

Í kjölfarið myndaðist langur listi af pöntunum sem undirstrikar að hér sé komin fram nýjung sem fólk tengir sterkt við.

„Fólk er byrjað að pæla meira í hljóðvist heima hjá sér og er að átta sig á því að hún er mikilvægur þáttur í því að líða vel í eigin rými. 

Við finnum fyrir því að fólk langar að bæta hljóðvistina á fallegan hátt, en margar hljóðvistarlausnir á markaðnum eru annaðhvort dálítið skrifstofulegar eða augljósar í tilgangi sínum,“ segir Heiðbjört og bætir við: 

„Rannsóknir sýna að slæm hljóðvist hefur áhrif á einbeitingu, heilsu og lífsgæði. Hljóðdempandi silkiprentin sameina því aldagamla handverks aðferð og nútímalega hljóðvistartækni á hátt sem bæði gleður augað og róar rýmið.“

Þúsund ára gömul aðferð

Silkiprent eða handprent er um þúsund ára gömul aðferð sem á rætur að rekja til Kína og er nú notuð af fagfólki og listamönnum um allan heim. 

Hljóðdempandi silkiprentverkin eru handsmíðuð frá A til Ö hér á Íslandi af Stúdíó Suð. Verkin eru handprentuð á náttúrulegt hör, innihalda hljóðdempandi þéttull og innrömmuð í gegnheila eik.

Það er nóg um að vera hjá Stúdíó Suð, sem tekur nú þátt í tveimur sýningum; hljóðdempandi verk þeirra má nálgast bæði í La Boutique Design í Reykjavík og í Listasal Mosfellsbæjar fram að jólum.