Undra­barnið nú verð­mætasti knatt­spyrnu­maður heims

Samkvæmt nýrri samantekt rannsóknarstofu fótboltans, Cies, þá er verðmæti Yamal nú meira en fjögur hundruð milljónir evra eða um 58 milljarðar íslenskra króna.

Barcelona gerir vel grein fyrir verðmæti hans og gekk á dögunum frá nýjum samningi við kappann sem nær til ársins 2031.

Þá verður Yamal samt bara orðinn 23 ára gamall og ætti þá að eiga öll sín bestu ár eftir í boltanum.

Nákvæmt verðmat Cies á Yamal er 402,3 milljónir evra. Í öðru sæti er norski framherjinn Erling Braut Haaland en hann er samt langt á eftir. Verðmat þess norska eru 239,6 milljónir evra og þriðji er síðan enski landsliðsmaðurinn Jude Bellingham sem er metinn á 233,8 milljónir evra.

Aðrir á topp tíu eru síðan Kylian Mbappé, Jamal Musiala, Pedri González, Vinícius Júnior, Cole Palmer, Julián Álvarez og Florian Wirtz.