Innlent

Mygla í Árna­safni: „Hand­ritin eru örugg“

Rafn Ágúst Ragnarsson skrifar
Annette Lassen er prófessor við Árnasafn í Kaupmannahöfn.
Annette Lassen er prófessor við Árnasafn í Kaupmannahöfn. Vísir/Samsett

Árnasafni í Kaupmannahöfn, systurstofnun Stofnunar Árna Magnússonar á Íslandi, hefur verið lokað tímabundið og starfsmönnum dreift um háskólasvæðið eftir að mygla fannst í þremur byggingum á háskólasvæði Kaupmannahafnarháskóla á Ámakri.

Um helmingur handritasafns Árna Magnússonar er enn geymdur í Kaupmannahöfn í umsjá danskra íslensku- og norrænufræðinga. Þeirra á meðal er Annette Lassen prófessor sem talar lýtalausa íslensku og er sérfræðingur á sviði norrænna fornbókmennta og goðafræða.

„Handritageymslan er eins og bygging í byggingunni þannig að það er engin mygla þar. Handritin eru örugg. Forvörðurinn okkar athugar á hverjum degi,“ segir Annette.

Hún segir að í ljós hafi komið að rigning hafi getað smogið inn um gluggana sem hafi komið að vissu leyti á óvart því háskólasvæði Kaupmannahafnarháskóla á Ámakri er spánnýtt. Árnasafn flutti þangað inn árið 2002.

Annette segir starfsmenn Árnasafns ekki mega vera á staðnum og að þeir vinni ýmist að heiman eða á nemendasvæðum víða um háskólasvæðið. Hún segir enn ekki ljóst hversu umfangsmikið vandamálið sé en að hýsa eigi starfsmennina í nýrri byggingu í þessum mánuði. Handritin verði áfram í hvelfingu sinni og vel verði fylgst með þeim. Hún vonast til þess að geta flutt aftur inn á skrifstofuna á næsta ári.




Fleiri fréttir

Sjá meira


×