Besti árangur Andreu á tímabilinu: Var með forystuna en endaði í fjórða sæti

Ágúst Orri Arnarson skrifar 31. maí 2025 13:12

Andrea Bergsdóttir er að taka þátt á LET Access mótaröðinni í fyrsta sinn. santander golf tour

Andrea Bergsdóttir náði sínum besta árangri á tímabilinu þegar hún hafnaði í fjórða sæti á Santander golfmótinu á LET Access mótaröðinni. Andrea var í efsta sæti fyrir lokahringinn á Naturavila golfvellinum í dag en endaði einu höggi á eftir efstu þremur kylfingunum.

Eftir tvo hringi var Andrea efst, sjö höggum undir pari. Hún lék fyrsta hring mótsins á 68 höggum og fór annan hringinn í gær á 69 höggum.

Í dag fór Andrea hringinn á 71 höggi þannig að hún endaði mótið átta höggum undir pari. Hún missti efsta sætið frá sér með tvöföldum skolla á sjöundu holu.

Þrír kylfingar enduðu jafnir, níu höggum undir pari, í efsta sætinu og eru á leið í umspil. Ragnhildur Kristinsdóttir tók einnig þátt í mótinu og hafnaði í átjánda sæti, tveimur höggum undir pari.

Þetta var fimmta mót Andreu á LET Access mótaröðinni á þessu tímabili, besti árangur hennar fram að þessu var 23. sæti á Terre Blance mótinu í Frakklandi. Fyrir mótið var hún í 55. sæti heildarstigalistans en mun hækka eftir helgi.

Í lok tímabils fá efstu sjö kylfingarnir á stigalista LET Access mótaraðarinnar fá fullan þátttökurétt á LET mótaröðina á næsta tímabili. Kylfingarnir í 8.-32. sæti komast beint í lokaúrtökumótið og eiga bæði möguleika á fullum og skilyrtum þáttökurétt í mótaröðinni.

Golf