Fjöldi fólks á opnun fölsuðu verkanna

„Eftirlíkingar listaverka og ýmis konar falsanir hafa þekkst frá fornu fari og enn koma upp fölsunarmál víða um lönd þar sem mikið kann að liggja undir. Á mörgum söfnum leynast vafasöm verk sem hafa ratað þar inn með margvíslegum hætti og á það einnig við um Listasafn Íslands.

Á sýningunni eru sagðar níu sögur af fölsuðum verkum sem hafa borist safninu með ýmsum hætti en öll tengjast þau hinu svonefnda stóra málverkafölsunarmáli sem hófst á síðasta tug 20. aldar. Undanfarin misseri hafa starfsmenn safnsins rannsakað þessi verk og hefur margt forvitnilegt komið í ljós. 

Iðulega eru fölsuð verk og eftirlíkingar eignuð látnum listamönnum en enginn er þó óhultur fyrir glæpum af þessu tagi. 

Málverkafalsanir fela meðal annars í sér skjalafals og fjársvik. Auk þess er fölsun málverka brot á höfundalögum en óheimilt er að breyta verki höfundar, þannig að höfundarheiður hans eða höfundarsérkenni séu skert.

Með þessari einstöku sýningu vill Listasafn Íslands stuðla að vitundarvakningu varðandi listaverkafalsanir hér á landi og kynna rannsóknaraðferðir sem varpa ljósi á uppruna verka,“ segir í fréttatilkynningu frá safninu. 

Safnið stendur sömuleiðis fyrir námskeiði í lok apríl undir heitinu Afhjúpun blekkingar - Um eftirlíkingar og falsanir.

„Á námskeiðinu verður m.a. fjallað um „stóra málverkafölsunarmálið“, hvernig megi meta uppruna listaverka, tæknileg vinnubrögð við rannsóknir á fölsunum útskýrð og farið yfir viðbrögð safna og stofnana við fölsuðum listaverkum,“ segir jafnframt í tilkynningunni. 

Hér má sjá myndir frá opnun sýningarinnar: