Fótbolti

Orri hitaði upp en fór veikur inn í klefa

Sindri Sverrisson skrifar
Orri Steinn Óskarsson skoraði í báðum leikjum Íslands gegn Kósovó, sínum fyrstu sem fyrirliði landsliðsins, en gat ekki beitt sér fyrir Real Sociedad í dag.
Orri Steinn Óskarsson skoraði í báðum leikjum Íslands gegn Kósovó, sínum fyrstu sem fyrirliði landsliðsins, en gat ekki beitt sér fyrir Real Sociedad í dag. Getty/Alex Nicodim

Eftir að hafa skorað í báðum landsleikjum Íslands gegn Kósovó í umspilinu í Þjóðadeildinni hugðist landsliðsfyrirliðinn Orri Óskarsson spila með Real Sociedad á Spáni í dag en varð skyndilega að hætta við vegna veikinda.

Real Sociedad segir frá því á samfélagsmiðlum sínum að Orri hafi fengið iðrakveisu og því þurft að hætta við að mæta Valladolid í dag.

Hann var í leikmannahópnum en samkvæmt útsendingu DAZN neyddist hann til að yfirgefa upphitun og halda til búningsklefa. Því var hann ekki skráður á endanlega leikskýrslu.

Án Orra náði Real Sociedad þó að knýja fram 2-1 sigur með mörkum frá Mikel Oyarzabal og Sergio Gómez. Juanmi Latasa minnkaði muninn fyrir gestina í uppbótartíma.

Real Sociedad er nú með 38 stig í 9. sæti deildarinnar en Valladolid á botninum með aðeins 16 stig eftir 29 leiki af 38.

Orri verður vonandi búinn að jafna sig fyrir stórleikinn við Real Madrid á þriðjudag í undanúrslitum spænsku bikarkeppninnar. Real Madrid er 1-0 yfir í einvíginu eftir sigur á útivelli í fyrri leiknum.

Spænski boltinn

Mest lesið


Fleiri fréttir

Sjá meira


×

Mest lesið