Níu­tíu prósent Ís­lendinga geti sest í helgan stein fyrir þrí­tugt

Íris er gift ekvadoríska fimleikakennaranum Alfredo og saman eiga þau dótturina Anastasiu. Íris á og rekur bókhaldsþjónustuna Accounta og stofnaði nýsköpunarfyrirtækið Virkum sem sérhæfir sig í sjálfvirkum drögum að tölvupóstum.

Horfa má á þáttinn í heild sinni hér fyrir neðan.

Unnið að þessu í fjögur ár

Íris segist í Íslandi í dag ætla að setjast í helgan stein fyrir þrítugt með aðferð sem kallast FIRE. Hún segir þetta snúast um valfrelsi.

„FIRE þýðir semsagt Financial Independence Retire Early og þetta er hreyfing sem snýst um það að öðlast fjárhagslegt frelsi þannig að þú getir valið það hvort þú viljir vinna eða ekki, þú sért ekki að vinna af því að þú neyðist til þess að vinna og getir þannig farið á eftirlaun ef það er það sem þú vilt þegar þér hentar en ekki þegar lífeyrissjóðurinn segir: Jæja, nú er þinn tími kominn sæta.“

Íris hefur unnið að þessu síðustu fjögur árin og með því að reikna út tekjur, gjöld og eignir fann hún út að hún gæti öðlast fjárhagslegt frelsi fyrir þrítugt. Hún segist í Íslandi í dag hafa ákveðið að setja sér þetta markmið og segja engum frá því, því þetta hafi hljómað svo klikkað.

„Þangað til að ég sagði frá þessu á TikTok og þá allt í einu vaknaði rosalegur áhugi því þetta er eitthvað sem margir vissu kannski bara ekki að væri hægt en fyrir okkur Íslendinga er þetta algjörlega eitthvað sem er hægt fyrir 90 prósent af þjóðinni, en þú þarft bara að vera dálítið agaður.“

Yfir helmingur í sparnað

Það hljómar svo sannarlega framandi að fara á eftirlaun fyrir þrítugt. En hvað þarf Íris að gera til þess að ná þessu markmiði?

„Ég er semsagt að leggja fyrir yfir helming af tekjunum mínum alltaf í hverjum einasta mánuði og þetta snýst auðvitað um það að þú ert að reyna að búa til sem mestar tekjur og takmarka öll útgjöld. Þannig ég er að lifa mjög spart og græða eins mikið og ég mögulega get og leggja allan þennan pening fyrir, allur aukapeningur sem er að koma inn fer bara beint í sparnað,“ segir Íris Líf í Íslandi í dag.

„Að láta peninginn vinna fyrir þig er í rauninni að nýta peninginn í þína þágu, þannig að peningurinn er að ávaxtast sem býr til meiri pening án þess að þú þurfir að hafa mikið fyrir því. Af því að þegar þú ert komin með stóra summu, þegar þú ert komin með einhverja hundruði milljóna, að ef þú ert með það á góðri ávöxtun að þá eru vaxtatekjurnar svo góðar að þú getur lifað á vaxtatekjunum.“

Íris segir marga halda að hún megi ekki vinna. Þetta snúist þó alls ekki um það, heldur frelsi til þess að velja hvað það er sem mann virkilega langar til að gera. „Ef ég finn það að mig langar að vinna þá er ekkert sem stoppar mig frá því að gera það en þá veit ég að ég er að gera það algjörlega hundrað prósent af því mig langar það og ekki af því að ég þarf þess.“ 

Bílalán á bannlista

Þá fer Íris í Íslandi í dag yfir hvernig húsnæðislán hún er með. Svarið kemur á óvart. Hún fer líka yfir ýmislegt sem er á bannlista hjá henni. Eitt af því eru bílalán. 

„Það eru alveg á bannlista hjá mér. Ef þú átt ekki pening fyrir bíl þá áttu ekki að eiga bíl. Þetta er mín skoðun og kannski er ég rosa hörð að segja þetta, en keyptu bíl sem þú átt efni á. Þannig ég er ekki að keyra um á flottasta bílnum, alls ekki,“ segir Íris. 

„Ég hata rekstrarkostnað við bíla, finnst ógeðslega leiðinlegt að eiga bíl og bílar eru nánast alltaf peningur sem þú ert að henda í ruslið því þetta er ekki fjárfesting sem er að fara að skila jákvæðri ávöxtun. Þannig að það að henda síðan inn bílaláni í myndina er aaalveg. Ég mæli ekki með því fyrir neinn. Þannig ef þið eigið núna Tesluna eða Land Cruiserinn, seljið þetta bara og kaupið ykkur ódýran bíl og safniði síðan bara fyrir Teslunni eða Land Cruisernum ef þið þurfið að eiga það. Við erum alltof góðu vön.“