Tannvesen á Mbappé sem spilar ekki í kvöld

Mbappé er enn að jafna sig eftir heimsókn til tannlæknis í vikunni en tönn var þá dregin úr kappanum.

Mbappé hefur verið sjóðheitur á nýju ári en hann hefur þegar skorað fjórtán mörk á árinu 2025 þar af þrennu í sigri á Manchester City í Meistaradeildinni.

Markvörðurinn Thibaut Courtois og miðjumaðurinn Federico Valverde missa líka af leiknum í kvöld.

Þetta er fyrri leikur liðanna en það lið sem hefur betur mætir annað hvort Barcelona eða Atletico Madrid í bikarúrslitaleiknum.

Carlo Ancelotti sagði frá tannvesinu á Mbappé í gær en bjóst þá við því að hann færi til San Sebastian í dag. Frakkinn er hins vegar ekki leikfær því hann er ekki í leikmannahópnum sem Real Madrid tilkynnti á miðlum sínum.