Að­ventan með Lindu Ben: Mjúkir kanilsnúðar með val­hnetu­kara­mellu

Í þessum fyrsta þætti sýnir Linda okkur notalegan jólabröns með girnilegum mjúkum kanilsnúðum með valhnetukaramellu, ljúffengum pönnukökum, jólajógúrt og klassísku heitu súkkulaði.

Mjúkir kanilsnúðar með valhnetukaramellu

Kanilsnúðar

• 7 g þurrger
• 120 ml volgt vatn
• 120 ml volg mjólk
• ½ dl sykur
• 80 g brætt smjör
• 1 tsk salt
• 1 egg
• 450 g hveiti

Kanilfylling

• 120 g mjúkt smjör
• 2 dl sykur
• 2 msk kanill

Setjið volgt vatn og volga mjólk ásamt gerinu og sykri í hrærivél og hrærið smá til að þurrgerið blotni.

Bætið eggi, smjöri og salti saman við.

Bætið svo nánast öllu hveitinu út í, skiljið um það bil 50 g eftir og hellið gerblöndunni líka ofan í stóru skálina.

Hnoðið deigið saman þangað til allt hefur blandast vel. Deigið á að vera klístrað en ef það er ennþá mjög blautt setjið þá restina af hveitinu út í.

Látið deigið hefast í 1 – 1 ½ klst eða þangað til deigið hefur tvöfaldast í stærð.

Útbúið valhnetukaramelluna á meðan degið hefast.

Valhnetukaramella

• 150 g valhnetur
• 100 g púðursykur
• 50 g hvítur sykur
• 150 g hlynsíróp
• 50 g smjör
• 50 ml mjólk
• ⅓ tsk salt

Setjið hlynsíróp og smjör saman í pönnu þar til bráðnað, bætið þá öllum öðrum innihaldsefnum á pönnuna og hitið þar til sykurkornin eru bráðnuð.

Bætið þá valhnetum út á pönnuna og hrærið þar til karamellan þekur hneturnar.

Setjið valhnetukaramelluna í stórt eldfast mót

Þegar deigið hefur hefað sig dreifið þið svolítið af hveiti á borðið, takið deigið úr skálinni og fletjið það út í um það bil 20×40 cm flöt.

Blandið saman mjúku smjöri, sykri og kanil í skál, hrærið þar til blandað saman. Smyrjið fyllingunni yfir allt deigið.

Rúllið svo upp deiginu frá 40 cm endanum í lengju og skerið hana svo í 12 – 15 bita.

Raðið snúðunum ofan á karamelluna, það má vera frekar rúmt á milli snúðanna því þeir eiga eftir að stækka.

Leggið hreint viskastykki yfir formið og látið snúðana hefast aftur í 30-60 mínútur

Stillið ofninn á 175°C og undir- og yfirhita.

Setjið snúðana í ofninn og látið bakast í 35-45 mín (tími fer eftir hversu þykkir snúðarnir eru) eða þangað til þeir eru orðnir fallega gullnir á litinn.

Heitt súkkulaði

• 500 ml nýmjólk frá Örnu mjólkurvörum
• 150 g dökkt súkkulaði
• 2 msk sykur
• Rjómi frá Örnu mjólkurvörum

Setjið mjólkina í pott ásamt sykrinum og súkkulaðinu, hitið að suðu en látið ekki sjóða.

Slökkvið á hitanum undir súkkulaðinu og hrærið saman þar til allt hefur samlagast.

Hellið í bolla eða glös, þeytið rjómann og bætið út á heita súkkulaðið.