Horizon Zero Dawn upp­færður: Besta tæki­færið til að stökkva í sögu Aloy

Í HZD setja spilarar sig í spor Aloy, sem er ungur framtíðarhellisbúi sem veiðir vélmenni með boga og spjóti, auk annarra vopna. Lengurinn gerist langt í framtíðinni og er mannkynið allt í mikilli hættu vegna háþróaðra vélmenna.

Sjá einnig: Framtíðin er ekki björt en hún er skemmtileg

Leikurinn gerist í fallegum opnum söguheimi þar sem rústir gamalla borga má finna víða á mismunandi svæðum eins og frumskógum, fjallendi og sléttum.

HZD var gerður af Guerrilla Games og hefur nú verið uppfærður með aðstoð starfsmanna Nixxes, sem hafa gert sambærilegar uppfærslur á nokkrum leikjum Sony á undanförnum árum.

Nýjasta uppfærslan gerir leikinn fallegri, bæði með betri grafík og með því að fríska upp á sjálft umhverfi leiksins. Bæta við trjám og öðrum gróðri og í senn uppfæra útlit gróðursins.

Einnig voru byggð ból söguheimsins endurbætt með fleiri byggingum, fleiri manneskjum og öðrum leiðum. Til dæmis voru manneskjur borganna gerðar líflegri og var reynt að bæta heildarandrúmsloft bæja og borga.

Þá var tekið upp mikið af nýju myndefni til að gera hreyfingar persóna betri og raunverulegri. Á því sviði var HZD færður nærri framhaldsleiknum Forbidden West. Frekari útlistanir á uppfærslum leiksins má finna á vef Sony.

Saga HZD er líklega besti hluti leiksins og strax í upphafi leiksins fann ég fyrir þessari sömu gömlu tilfinningu og ég upplifði árið 2017. „Hvað gerðist eiginlega í þessum heimi?“ Hugsaði ég 2017. Núna hugsaði ég hvað ég hafði gaman af því að upplifa söguna þá.

Sem Aloy er merkilega áhugavert að laumast um rústir fornmannanna og varpa ljósi á hvað kom fyrir þá, hvaðan vélmennin koma og þá ógn sem heimurinn stendur nú frammi fyrir.

Bardagakerfið er líka mjög skemmtilegt. Það blandar saman margvíslegum vopnum, þó ég notist eiginlega alltaf bara við bogann og spjótið.

Hvert vélmenni er með veikleika og Alot getur nýtt sér þá. Þeir sjást með því að skanna vélmennin og beita misunandi örvum til að skemma vopn sem vélmenni bera, aðrar eru hannaðar til að losa ytra lag vélmennanna og finna nýja veikleika á þeim.

Einnig er hægt að nota gildrur og önnur vopn til að sigra vélmennin.

Samantekt-ish

Horizon Zero Dawn er ekki gamall leikur, enda er hann frá 2017. Þá var hann gefinn út á PC-tölvur árið 2020. Það er alveg vert að spyrja hvort tilefni hafi verið til að uppfæra þennan leik með þessum hætti en ég get ekki sagt annað en að það hafi komið vel út.

Við spilunin hef ég ítrekað hugsað um hve mikið ég væri til í að gleyma öllu sem ég vissi um sögu leiksins, því ég hef sjaldan áður fallið jafn mikið fyrir söguheimi og reynt jafn mikið á mig að safna öllum þeim upplýsingum sem ég get.

Ég öfunda þá svolítið sem hafa ekki spilað þennan leik að fá tækifæri til þess.