Tekur hanskana af hillunni og hjálpar Börsungum í neyð

Szczesny var markvörður Juventus á Ítalíu frá 2017 þar til í sumar er hann lagði markmannshansakan á hilluna eftir að samningur hans í Tórínó rann út.

Í kjölfar meiðsla Marc-André ter Stegen, aðalmarkvarðar Barcelona á dögunum sem verður lengi frá, neyddust Börsungar til þess að leita logandi ljósi að markverði og hafa þeir nú sannfært pólska landsliðsmarkvörðinn fyrrverandi til þess að aðstoða sig. 

Það er ítalski félagsskiptasérfræðingurinn Fabrizio Romano sem greindi frá því fyrr í dag að samkomulag hefði náðst milli Szczesny og Barcelona um eins árs samning. 

Hjá Barcelona mun Szczesny mynda markvarðarteymi með hinum uppalda Inaki Pena þar til að Ter Stegen snýr aftur. Verður þetta í fyrsta sinn á ferlinum sem Szczesny reynir fyrir sér í spænsku úrvalsdeildinni en auk Juventus hefur hann verið á mála hjá Arsenal á sínum ferli.

Barcelona hefur farið afar vel af stað í spænsku deildinni á yfirstandandi tímabili. Þar hefur liðið unnið alla sex leiki sína til þessa, skorað tuttugu og tvö mörk og aðeins fengið á sig fimm.