Mikil væntum­þykja í garð lyklakippunnar

Það leynist ýmislegt í tösku Sigríðar Margrétar.

Hvað er í töskunni þinni og segðu okkur aðeins frá því sem er?

Airpods, gömul digital myndavél sem ég tek með mér hvert sem ég fer og SD kortalesari til að geta fært myndirnar af kortinu hratt og örugglega inn á símann.

Lyklar, kveikjari, thrifað Fendi veski sem ég geymi allt það helsta í (kort, seðla, klink og kvittanir/nótur), sólgleraugu og uppáhalds penninn minn frá París.

Spennur, nóg af ilmvatnsprufum, gott vara-kombó; Charlotte Tilbury varablýantur og Laneige gloss, sólgleraugu frá besta Chimi, margnota púður frá YSL, Bal d’Afrique handáburður frá Byredo - besta lyktin, mini Body Serum frá Bioeffect, naglaþjöl, hringur sem litla frænka mín gaf mér og þykir mjög vænt um og að sjálfsögðu tyggjó!

Hefur einhver hlutur tilfinningalegt gildi?

Lyklakippan mín! Á henni hangir hjarta sem stendur Best og mamma mín er með hinn helminginn á móti á sinni lyklakippu, mér þykir mjög vænt um það.

Hver er þín uppáhalds taska og afhverju?

Fendi Baguette sem ég keypti notaða þegar ég bjó í Danmörku! Hún er mjög rúmgóð en ekki of stór. Í henni eru þrjú hólf sem er þægilegt upp á skipulag að gera. Ég tók upprunalegu Fendi leðurólina af og setti fallega ól frá Hvisk í staðinn sem gerir hana einstaka! Sömuleiðis held ég að ákveðið tilfinningalegt gildi fylgi töskunni, hún minnir mig á bestu Köben.

Ertu dugleg að taka til í töskunni þinni og halda röð og reglu?

Já, ég myndi segja það! Það er í raun bara nauðsynlegt fyrir mig að taka til í töskunni af og til, sjá hvað ég er með á mér og vera viss um að ég sé með allt sem ég þarf fyrir vikuna.

Ertu gjarnan með margar töskur á þér eða margar til skiptanna?

Já, ég skipti frekar oft um tösku, stundum nokkrum sinnum í viku. 

Það fer allt eftir því í hvernig stuði ég er og í hverju ég er þann daginn en litlu svörtu Gucci töskuna tek ég alltaf með mér. Þar geymi ég allt það helsta og það er svo þægilegt að henda henni bara á milli taska.

Stór eða lítil taska og afhverju?

Einhvers staðar þar á milli. Ég vil ekki hafa þær of litlar en mér finnst best að geta haft allt með mér, gloss, tyggjó, myndavélina og allt þetta helsta.