Féllust í faðma á tilfinningaríkri stundu

Í myndinni eru tekin viðtöl við átta konur á ólíkum aldri auk aðstandenda þeirra og sérfræðinga í kvensjúkdómalækningum. Þar má sjá nöturlegan veruleika þeirra sem glíma við ósýnilega verki og ófrjósemi. 

Leikstjóri myndarinnar er Þóra Karítas Árnadóttir en myndin er framleidd af Silfra Productions og Endósamtökunum. Uppselt var á frumsýningu en myndin er komin í almenna sölu hjá Bíó Paradís.

Á eftir myndinni voru pallborðsumræður þar sem Þóra Karítas Árnadóttir leikstjóri myndarinnar, Lilja Guðmundsdóttir formaður Endósamtakanna og sérfræðingar í sjúkdómnum þau Ragnheiður Oddný Árnadóttir, Jón Ívar Einarson og Hildur Guðjónsdóttir ræddu sjúkdóminn og heilbrigðiskerfið. 

Þau voru sammála um að vitundarvakningin sem myndin mun stuðla að verði til þess að greiningartími styttist en hann er að meðaltali 7-10 ár. 1 af hverjum 10 konum sem fæðast með innri kvenkyns líffæri eru með endómetríósu sem er krónískur bólgu og verkjasjúkdómur en engin lækning er við sjúkdómnum.