Ein­kunnir Ís­lands: Albert og Hákon bestir í grátlegu tapi

Íslenska liðið spilaði vel stærstan hluta leiksins og náði forystunni eftir hálftíma leik þegar Albert Guðmundsson skoraði glæsilegt mark með skoti fyrir utan teig.

Úkraínumenn sóttu hins vegar stíft í síðari hálfleik, en íslenska vörnin stóð að miklu leyti vel. Viktor Tsygankov jafnaði hins vegar metin fyrir Úkraínu á 54. mínútu eftir snögga sókn áður en Mykhailo Mudryk tryggði liðinu farseðilinn á EM á kostnað Íslendinga með svipuðu marki á 84. mínútu. EM-draumur Íslands er þar með úr sögunni.

Einkunnir Íslands í leiknum:

Hákon Rafn Valdimarsson, markvörður 7

Öruggur í flestum sínum aðgerðum framan af leik og á teiginn þegar andstæðingar Íslands koma með fyrirgjafir. Mögulega er hægt að setja spurningamerki við staðsetningar Hákons í báðum mörkum úkraínska liðsins.

Guðmundur Þórarinsson, vinstri bakvörður 5

Hleypti Viktor Tsygankov full auðveldlega inn að miðju í jöfnunarmarki Úkraínu og hefur klárlega átt betri daga í íslensku treyjunni. Var svo tekinn af velli stuttu eftir fyrra mark Úkraínu.

Daníel Leó Grétarsson, miðvörður 6

Svaraði ágætlega fyrir frammistöðu sína í leiknum gegn Ísrael og átti fína kafla í miðverðinum.

Sverrir Ingi Ingason, miðvörður 7

Stóð vaktina nokkuð vel í miðverðinum og er mikill leiðtogi inni á vellinum. Nældi sér í spjald eftir tæplega klukkutíma leik sem hann hefði líklega getað sleppt.

Guðlaugur Victor Pálsson, hægri bakvörður 6

Fékk það erfiða verkefni að eltast við eldsnöggan Mykhailo Mudryk og átti það til að lenda á eftir Chelsea-manninum.

Jóhann Berg Guðmundsson, miðjumaður (fyrirliði) 6

Skilaði fínu dagsverki en höfum oft séð betri frammistöðu frá fyriliðanum.

Arnór Ingvi Traustason, miðjumaður 6

Iðinn eins og oft áður inni á miðsvæðinu og skilaði sínu.

Jón Dagur Þorsteinsson, vinstri kantur 8

Var ógnandi í sóknarleik Íslands og átti tvö góð skot á markið sem neyddu Andriy Lunin, markvörð Úkraínu og Real Madrid, í góðar vörslur.

Hákon Arnar Haraldsson, hægri kantur 8

Átti stóran þátt í marki Íslands og sýndi oft og tíðum snilldar takta. Gerði úkraínska liðinu oft erfitt fyrir, sérstaklega í fyrri hálfleik.

Andri Lucas Gudjohnsen, framherji 7

Fékk úr litlu að moða, en ótrúlega iðinn í fremstu víglínu. Vann hvern skallaboltann á fætur öðrum en vantaði oft menn til að taka seinni boltann.

Albert Guðmundsson, framherji 8

Sýndi enn og aftur hversu mikilvægur hann er fyrir íslenska liðið. Skoraði alvöru mark á 30. mínútu með glæsilegu skoti, sem dugði reyndar því miður ekki til.

Varamenn:

Kolbeinn Finnsson kom inn á fyrir Guðmund Þórarinsson á 63. mínútu 6

Kom inn á með ferska fætur og fór margar ferðir upp og niður vinstri kantinn. Náði þó ekki að skapa mikið fyrir liðsfélaga sína.

Orri Steinn Óskarsson kom inn á fyrir Andra Lucas Guðjohnsen á 63. mínútu 5

Kom inn á í erfitt hlutverk fyrir Andra Lucas, en náði ekki að fylgja því jafn vel eftir.

Mikael Neville Anderson kom inn á fyrir Hákon Arnar Haraldsson á 87. mínútu.

Spilaði ekki nóg til að fá einkunn.

Mikael Egill Ellertsson kom inn á fyrir Jón Dag Þorsteinsson á 87. mínútu.

Spilaði ekki nóg til að fá einkunn.