Tveir landsliðsmenn taka við þjálfun ÍBU

Aðalþjálfari liðsins verður Tindur Örvar Örvarsson. Hann er 23 ára gamall og þrátt fyrir ungan aldur er hann alls ekki að stíga sín fyrstu skref í þjálfun. Í fréttatilkynningu ÍBU segir:

„Tindur er 23 ára gamall en þrátt fyrir ungan aldur hefur hann þó nokkra reynslu í þjálfun og þekkir vel til neðri-deildarboltans á Íslandi. Tindur er einn stofnenda FC Árbæjar og og stýrði hann því liði upp um deild í fyrstu tilraun tímabilið 2022 og gerði liðið svo gott mót ári seinna, 3 stigum frá því að fara aftur upp!“

Honum til aðstoðar verður Aron Þormar Lárusson en hann verður spilandi aðstoðarþjálfari liðsins. Þeir Tindur og Aron eru eins og áður sagði reyndir landsliðsmenn, en þeir hafa báðir verið í íslenska landsliðinu í eFótbolta frá 2020 og þykja með frambærilegri spilurum landsins í FIFA. Hvort það hjálpi þeim við að stýra liði ÍBU í sumar verður framtíðin að leiða í ljós.