Ótrúleg uppákoma í Vegas: „Er þetta holræsi?“

Ingvi Þór Sæmundsson skrifar 17. nóvember 2023 11:02

Starfsmenn steypa yfir holræsaopið á brautinni í Las Vegas. getty/Jared C. Tilton

Allt virðist vera í steik í Las Vegas þar sem næstsíðasta keppni tímabilsins í Formúlu 1 fer fram. Æfingin var stöðvuð eftir aðeins níu mínútur þegar bíll Carlos Sainz, ökumanns Ferrari, eyðilagðist.

Ekki virðist hafa verið farið nógu vel yfir brautina, sem er á hinni frægu Strip götu fyrir framan öll aðal spilavítin, því bíll Sainz skemmdist þegar hann keyrði á holræsalok á brautinni. Skömmu áður hafði Alpine-bíll Estebans Ocon eyðilagst á sama hátt.

Þeir Kristján Einar Kristjánsson og Bragi Þórðarson tóku daginn snemma og voru mættir til að lýsa æfingunni. Þeir voru afar hissa þegar stöðva þurfti æfinguna eftir að Sainz eyðilagði bílinn.

„Hvað gerist hérna? Er þetta holræsi?“ sagði Bragi forviða. „Þetta var hvellur, þetta var bang. Ég held að bíllinn rekist akkúrat niður og það brotnar eitthvað í mótornum.“

Klippa: Bíll Carlos Sainz skemmist

Sem fyrr sagði þurfti að stöðva æfinguna eftir að bíll Sainz eyðilagðist. Spánverjinn fékk líka tíu sæta refsingu eftir að hann keyrði á holræsalokið.

Akstursíþróttir