Ryder-bikarinn fór þetta árið fram í Evrópu, nánar tiltekið í Róm á Ítalíu. Úrvalslið Evrópu leiddi mótið allan tímann og sigldi svo í gær heim 16,5-11,5 sigri.
Norður-Írinn Rory McIlroy átti sína bestu frammistöðu í Ryder-bikarnum á ferlinum um helgina og eftir alls konar havarí á mótinu. Þar á meðal rifrildi við einn af kylfusveinum bandaríska liðsins, gat hann leyft sér að fagna vel og innilega er úrslitin voru ljós.
A furious Rory McIlroy confronted a Team USA caddie in the car park, after he was spotted waving his cap in McIlroy's face when lining up his final putt on 18 pic.twitter.com/Ha4r5hDsGi
— Sky Sports News (@SkySportsNews) September 30, 2023
„Ég er svo stoltur af því að vera hluti af þessu liði,“ sagði Rory eftir að úrslitin voru ráðin á Ryder-bikarnum. „Að baki er ótrúleg vika með þessum mönnum.“
Fyrir Ryder-bikar ársins hafði úrvalslið Evrópu tapað ansi illa fyrir Bandaríkjunum á þeirra heimavelli árið 2021. Rory segir það hafa verið ofarlega í huga kylfinga fyrir nýafstaðið mót.
„Við vorum særðir eftir það mót og við vildum slá frá okkur í ár, sanna fyrir heiminum að sú frammistaða sem við skiluðum af okkur árið 2021 hafi ekki verið okkur eðlislæg. Þetta var stórkostleg frammistaða hjá okkur.
Evrópska liðið setur stefnuna á að vinna Bandaríkin í Bandaríkjunum þegar Ryder-bikarinn fer þar fram að tveimur árum liðnum.
„Það að vinna Ryder-bikarinn á útivelli er eitt stærsta afrek sem maður getur náð í golfheiminum. Það er það sem við munum gera.“
