Reiði á Spáni: „Burt með Ronaldo!“

Valladolid gerði 3-3 jafntefli við Mallorca á heimavelli á páskasunnudag. Það var ekki hátíðarstemning í loftinu, þvert á móti usu stuðningsmenn úr skálum reiði sinnar gagnvart Ronaldo.

Ronaldo keypti 51 prósent hlut í Valladolid sumarið 2018 og stækkaði þann hlut í yfir 70 prósent ári síðar. Misvel hefur gengið innan vallar frá því að hann keypti félagið en Valladolid hefur þó aukið markaðstekjur sínar umtalsvert. Stuðningsmenn liðsins vilja þó meira.

Fjölmarga borða mátti sjá í stúkunni sem beint var gegn Ronaldo og þá heyrðust stuðningsmenn liðsins kyrja „Burt með Ronaldo!“

Eftir jafntefli sunnudagsins situr Valladolid í 17. sæti spænsku deildarinnar, tveimur stigum frá Valencia og Espanyol, sem eru í fallsætunum þar fyrir neðan.