Kvöldfréttir Stöðvar 2

Og enn og aftur eru myglumál ofarlega á baugi. Ráðast þarf í miklar endurbætur á friðuðu húsnæði Melaskóla í Vesturbæ Reykjavíkur vegna myglu. Við könnum aðstæður í skólanum í fréttatímanum, ræðum við fulltrúa borgarinnar og heyrum í formanni Foreldrafélags skólans í beinni útsendingu.

Þá förum við yfir leiðtogafund helstu iðnríkja heims sem haldinn var á Indlandi í dag. Skuggi innrásar Rússa í Úkraínu skyggði á öll önnur málefni fundarins.

Við ræðum einnig við rithöfund sem harmar brotthvarf pósthúsa, hittum 95 ára knapa sem ætlar á bak í vor og verðum í beinni útsendingu frá þrívíddarprentun á píkum í nafni valdeflingar. Allt þetta og meira til á slaginu 18:30 í kvöldfréttum Stöðvar 2.