Myndaveisla: Gísli frumsýndi Ferðabókina í Landnámssetrinu

Í sýningunni Ferðabók Gísla Einarssonar fer Gísli yfir rannsóknarniðurstöður Eggerts og Bjarna sem gefnar voru út í Ferðabók Eggerts og Bjarna árið 1772, þar sem farið er yfir landshætti og líf Íslendinga. Síðan hefur margt breyst en það hefur farist fyrir að uppfæra rannsóknir Eggerts og Bjarna, þangað til nú.

Í fréttatilkynningu segir meðal annars:

„Hinn víðförli Borgfirðingur, Gísli Einarsson, hefur undanfarinn aldarfjórðung ferðast fram og aftur um landið, hring eftir hring og aftur til baka og stúderað landshætti og líf landans með það að markmiði að taka upp þráðinn þar sem Eggert og Bjarni skildu við. Það markmið náðist ekki!

Niðurstaðan er uppistandssýning þar sem Gísli gerir grín að landanum í bland við heiðarlegar tilraunir til þess að leiðrétta eða hagræða niðurstöðum Eggerts og Bjarna. Markmiðið með sýningunni er alls ekki að hæðast að fólki og lítilsvirða eða ofbjóða áhorfendum með dónaskap. Hins vegar er svo sem ekkert gert til að koma í veg fyrir að það geti gerst.“

Uppselt er á sex sýningar en sex nýjar dagsetningar fara í sölu í þessari viku.

Hér má sjá myndir frá frumsýningardegi: