„Goðsagnakennd djammkvöld“

Blaðamaður tók púlsinn á Nadiu og fékk að heyra nánar frá þessari endurvakningu mánudags djammsins.

„Ágúst var rosalega viðburðaríkur mánuður á Prikinu og Geoff var búinn að setja upp mikið af giggum og viðburðum út mánuðinn.“ Það er alltaf eitthvað var nafn þessarar viðburðaraðar og segir Nadia það hafa átt einstaklega vel við þar sem það var eitthvað í gangi á hverjum degi.

„Hann tók svo mánudagana frá fyrir svokallað Staff’s Special. Það er mikið af hæfileikaríku fólki sem starfar á Prikinu, tónlistarfólk og svoleiðis, og mánudagarnir voru teknir frá fyrir starfsfólkið til að gera það sem þau gera utan Priksins.“

DJ tríó

Í kjölfarið ákváðu Nadia og tvær samstarfskonur hennar á Prikinu, þær Valgerður og Heiðbrá, að taka saman höndum.

„Við tókum einn mánudaginn frá fyrir okkur til að gera eitthvað saman og ákváðum að taka tríó DJ sett. Þannig komst mánudagsklúbburinn aftur af stað.“

Í kvöld halda stelpurnar sinn þriðja mánudagsklúbb en Nadia segir viðtökurnar hafa verið frábærar.

„Þetta fór fram úr okkar vonum. Fyrsta mánudaginn fylltist Prikið, við vorum það sér kokteila tilboð á barnum og það myndaðist biluð stemning, jafnvel betri en um helgar.“

Hún bætir við að þær séu enn að móta kvöldin en planið sé að hafa þau reglulega, líklegast annan hvern mánudag.

Djammdagur bransafólksins

Þá kviknar spurningin um aðal áherslu mánudagsklúbbsins, því hverjir ætli séu helst að djamma á mánudögum?

„Þetta er mikið hugsað fyrir fólk í bransanum, veitingabransanum, barstarfsfólk og fólk sem vinnur um helgar og missir því alltaf af djamminu. Fólk í bransanum á yfirleitt vini sem eru líka í bransanum og því eru mánudagar fullkomnir fyrir fólk að koma loksins saman og fá djammið sitt.“

Nadia á sjálf vini sem eru að vinna á börum í kring og finnst frábært að geta boðið þeim að koma á mánudegi og eiga skemmtilegt kvöld.

Allar koma með eitthvað á borðið

Þriðji mánudagsklúbburinn er sem áður segir haldinn í kvöld og hvetur Nadia fólk til að koma og njóta.

„Við erum þrjár saman að spila og blöndum okkar tónlistarsmekk þar sem allar koma með eitthvað á borðið. Alltaf þegar við hittumst tölum við um skvísutónlist only,“ segir Nadia og bætir við: „Við spilum hittara samtímans í bland við ýmislegt frá fyrri áratugum. Þetta eru lög sem allir kunna og lög sem allir geta sungið með í bland við einstaka önnur lög sem við viljum kynna fyrir fólkinu.“