„Ég myndi ekki vilja vera Brynjólfur, hann fær allt of mikið af sím­tölum“

„Fyrsta símtalið kemur klukkan 9:57 í morgun, sem ég náði ekki að svara. Svo er þetta bara búinn að vera stríður straumur,“ segir Jessý í samtali við fréttastofu. 

„Ég var að keyra, á leiðinni til læknis, og þá fékk ég símtal og það byrjar á því að ég er spurð hvort þetta sé Binni. Ég svara neitandi, þetta sé Jessý. Þá spyr hann mig hvort Binni sé þarna og ég svara aftur neitandi, enginn Binni hér. Svo hringir hann aftur nokkrum sekúndum síðar og biðst afsökunar, hann sé að hringja í skakkt númer,“ segir Jessý og heldur áfram. 

„Svo hringir hann aftur og spyr hvort þetta sé Binni. Nei, ég er ekki Binni, það er enginn Binni hérna. Svo bara gerist þetta nokkrum sinnum í röð,“ segir Jessý. Hún segir þennan sama mann hafa furðað sig á mistökunum, hann hafi jú rætt við téðan Binna daginn áður í þessu símanúmeri. 

Hélt þetta væri símaat

Jessý segist svo hafa komist að því að allt þetta ókunnuga fólk, sem var að hringja í hana, var að reyna að ná sambandi við Brynjólf nokkurn starfsmann Sáms Sápugerðar. 

„Þetta voru allt karlmenn og núna í kring um fjögur eiginlega snappaði ég á þann sem var að hringja, tíundi maðurinn eða eitthvað, og spyr hann hvort þetta sé nokkuð símaat. Hann bara ha? Ég veit ekki hversu margir eru búnir að hringja í mig að biðja um Brynjólf og ég spyr þennan mann hvort þetta sé símaat, ég greinilega geri ekki greinamun á karlmannsröddum,“ segir Jessý og hlær. 

„Hann svarar: Nei, Brynjólfur kom til mín í gær og ég ætlaði að selja honum bíl, ég veit ekki hvað er í gangi,“ segir Jessý. 

Hún segir manninn hafa gefið henni upp símanúmerið sem hann var að reyna að hringja í, sem reyndist símanúmer skráð á Sám Sápugerð. Svo virðist sem einhver hafi óvart látið áframsenda öll símtöl, sem bárust í það númer, á hana. 

„Það fyndnasta er að þetta voru greinilega allt viðskiptavinir sem áttu inni sápu hjá Sápugerðinni, af því að hann rekur þessa sápugerð,“ segir Jessý.

„Ég benti bara á að það þyrfti einhver annar að reyna að ná á hann því ég get ekki hringt í mitt símfyrirtæki því hann er augljóslega að láta áframsenda símtölin til mín en ekki öfugt. Ég held að einhver vinur hans hafi á endanum látið hann vita því þetta stoppaði um fimm leytið.“

„Ég er að pæla að gera þetta bara á móti“

Hún segist hafa verið farin að skella á símtöl sem bárust henni þar sem hún var handviss um að þau væru til Brynjólfs, en ekki til hennar sjálfrar. 

„Ég hélt það væri bara verið að gera símaat í mér þarna í lokin, mér fannst ekki geta verið að þetta væri enn svona. Ég hélt þetta væri bara sami maðurinn, einhver vinur minn, sem væri búinn að vera að grínast í allan dag.“

Hún segist ekkert hafa heyrt í Brynjólfi sjálfum en þurfi eiginlega að senda honum tölvupóst til að leiðrétta mistökin. 

„Ætli hann hafi ekki náð í símfyrirtækið sitt og leiðrétt þetta með einhverjum hætti. Ég er að fara erlendis, ég er að pæla að gera þetta bara á móti. Skrá númerið hans svo símtölin til mín fari til hans. Hann getur þá tekið við símtölum frá ömmum mínum og öfum,“ segir Jessý í gríni.