Börsungar endurheimtu annað sætið

Memphis Depay kom Börsungum yfir eftir 25 mínútna leik og sá til þess að liðið fór með 1-0 forystu inn í hálfleikinn.

Það var svo reynsluboltinn Sergio Busquets sem tvöfaldaði forystu heimamanna með góðu marki snemma í síðari hálfleik áður en Antonio Raillo klóraði í bakkann fyrir gestina rúmum tíu mínútum fyrir leikslok.

Það reyndist seinasta mark leiksins og niðurstaðan því 2-1 sigur Barcelona. Sigurinn lyfti liðinu aftur upp í annað sæti deildarinnar, en Börsungar hafa nú 66 stig eftir 34 leiki. Mallorca situr hins vegar í 16. sæti deildarinnar með 32 stig, aðeins einu stigi fyrir ofan fallsvæðið.