Skaut tveimur liðum á HM í blálokin

Þetta varð ljóst í dag þegar Japan vann dramatískan 2-0 sigur gegn Ástralíu en þetta var fyrsti útisigur Japana gegn Áströlum á þessari öld.

Liverpool-maðurinn Takumi Minamino hafði verið nálægt því að koma Japan yfir seint í leiknum en það var maðurinn sem leysti hann af hólmi, Kaoru Mitoma, sem reyndist hetja Japana.

Mitoma kom inn á þegar sex mínútur voru eftir af venjulegum leiktíma og skoraði fyrra mark sitt á 90. mínútu við gríðarlegan fögnuð. Seinna markið skoraði hann svo seint í uppbótartímanum.

Sigurinn tryggði ekki bara Japan sæti á HM heldur einnig Sádí-Arabíu sem þó hefði hvort sem er klárað dæmið síðar í dag, með sigri gegn Kína.

Ástralir, sem urðu fyrir barðinu á kórónuveirusmitum í aðdraganda leiksins, enda hins vegar í þriðja sæti riðilsins, þurfa að fara í umspil til að komast á HM og eiga því á hættu að missa af mótinu eftir að hafa verið með í síðustu fjögur skipti í röð.

Áður höfðu Suður-Kórea og Íran tryggt sér sæti á HM og líklegast er að Sameinuðu arabísku furstadæmin endi í 3. sæti og mæti Ástralíu í fyrri hluta umspilsins. Í seinni hluta umspilsins er spilað við lið úr Suður-Ameríku.