Trúa því að drengurinn sé faðir Elínar endurfæddur

Elín Kristjánsdóttir og Gísli Bachmann eignuðust son sinn í heimafæðingu, eftir að hafa farið á spítalann í sjö klukkustunda kærkomna hvíld. Fæðingarsaga þeirra er einstök, eins og kemur fram í nýjasta þættinum af hlaðvarpinu Kviknar.

Foreldrarnir trúa því að Kristján Máni, sé Kristján faðir Elínar endurfæddur.

„Ég missti pabba minn árið 2016 og ég hef alltaf trúað því að hann muni koma aftur til okkar. Svo þegar við vissum að við ættum von á strák hugsaði ég, já þetta er pabbi,“ útskýrir Elín.

„Við trúum á það. Ég starfa sem stjörnuspekingur Og það er bara partur af djobbinu að fyrri líf séu eitthvað sem er til staðar og er í rauninni raunveruleikinn,“ segir Gísli. Þau upplifðu bæði sterkt að faðir Elínar kæmi til þeirra aftur sem sonur þeirra, meira að segja áður en Elín varð ófrísk.

„Þegar hann var í maganum þá talaði ég alltaf um hann sem Kristján.“

Gamli karlinn kominn

Gísli segir að margir séu tabú á umræðuna um fyrri líf og því hafi þau ekki rætt þetta við marga.

„Ég trúi því ekki að lífið sé búið þegar það er búið. Ég held að við séum alltaf í stöðugri hringrás að kenna hvort öðru eitthvað nýtt,“ segir Elín.

„Ef ég á að tala hreint út þá hef ég verið á þeirri skoðun síðan hann fæddist að þetta sé gamli karlinn kominn. Það er svo fyndið með þessa gátt sem að kallast innsæi og næmni og fyrri líf og eitthvað, það er ekkert sem segir að þetta sé ekki rétt og ekkert sem segir að þetta sé rétt,“ segir Gísli.

„Það eru líka viss karaktereinkenni sem eru til staðar,“ segir Elín.

Þáttinn í heild sinni má finna á Spotify og helstu efnisveitum og í spilaranum hér fyrir neðan.