Ekkert lát á snörpum skjálftum

Ekkert lát virðist á skjálftavirkninni sem staðið hefur yfir á suðvesturhorninu í rúma tvo sólarhringa. Annar skjálfti að stærðinni 3,7 reið yfir norðaustur af Fagradalsfjalli klukkan 17:12

Rúmlega fimm þúsund skjálftar hafa mælst á svæðinu frá því að hrinan hófst. Í dag hafa 21 skjálftar að stærð 3 til 4,4 mælst við norðanvert Fagradalsfjall. 

Ekkert lát á skjálftahrinunni

Stór skjálfti að stærð 4,4 reið yfir upp úr klukkan tólf í dag og var sá ansi snarpur. Veðurstofa Íslands tók saman fimm stærstu skjálftana þegar þeir höfðu verið yfirfarnir klukkan 12:40. Þeir riðu yfir á 25 mínútna kafla frá 11:59 til 12:24.

Sá fyrsti var 3,4 að stærð, sá stærsti 4,4 að stærð klukkan 12:06 og svo annar 3,6 að stærð klukkan 12:10.

Við bættist einn 3,4 að stærð klukkan 12:14 og annar 4,0 að stærð 12:24. Allir skjálftarnir eru staðsettir um tvo kílómetra norður af Fagradalsfjalli.

Vísir hefur fylgst með gangi mála jafnóðum í vaktinni sem er neðst í fréttinni hér að neðan. Þar má sjá umfjöllun um skjálftahrinuna í dag sem og síðustu tvo sólarhringa.

Fréttin hefur verið uppfærð