Veiddu vel á léttklæddar flugur

Nú sitja fluguveiðimenn og konur við hnýtingargræjurnar sínar og undirbúa sig fyrir veiðisumarið sem nálgast óðfluga.

Það er auðvitað verið að hnýta þær flugur sem eiga að gefa þann stóra í sumar og sitt sýnist hverjum um hvaða flugur gefa best á hvaða tíma, hvaða stærð og svo framvegis. Eitt langar okkur samt að kenna þeim sem eru kannski að hnýta fyrstu laxaflugurnar en það er eitt það sem oft gleymist við hnýtingar. 

Þetta litla atriði er nefnilega ofur einfalt. Prófaðu að hnýta flugur sem eru léttklæddar. Ef þú ert ekki viss um að það sé málið má ég minna þig á að ein af gjöfulli flugum sem hægt er að nota til dæmis í laxi er Collie dog en flugan sú arna er ekkert nema silfurvafinn búkur með svörtum hárvæng. Hárvængurinn þarf alls ekki að vera mjög loðinn og lengdin á honum finnst mörgum gjöfulust ef vængurinn nær aðeins aftur fyrir öngul, ekki lengri en það. Of langur vængur gerir það oft að verkum að lax sem ætlar að taka fluguna nett grípur í hárin en ekki í krókana. En aftur á móti er langur Collie Dog með löngum hárum á hröðu strippi fáranlega góð fluga við réttar aðstæður.

Léttklæddar flugur á low water önglum eru mjög vinsælar víða hjá erlendum veiðimönnum og ég hvet ykkur til að prófa þetta.