Ætlaði að verða bóndi í Svartárkoti en er óvænt atvinnumaður í körfubolta

Kristján Már Unnarsson skrifar 15. nóvember 2020 08:14

Tryggvi Snær Hlinason tók sér smápásu frá því að leggja silunganetin með móður sinni, Guðrúnu Tryggvadóttur, til að ræða um æskuárin í Svartárkoti, líf atvinnumannsins á Spáni, körfuboltaferilinn og framtíðardraumana. Arnar Halldórsson

Ævintýrið um strákinn úr Svartárkoti í Bárðardal, sem núna spilar sem atvinnumaður í körfubolta á Spáni, í sterkustu deild Evrópu, er meðal þess sem áhorfendur fá að heyra um í þættinum Um land allt á Stöð 2 á mánudagskvöld.

Frá Svartárkoti. Bæjarhúsin standa við útfall Svartár úr Svartárvatni.Arnar Halldórsson

Þar kynnumst við lífi stórfjölskyldunnar í Svartárkoti í Þingeyjarsveit. Þótt jörðin sé í 400 metra hæð yfir sjávarmáli, við jaðar Ódáðahrauns, hefur hún í mörg ár verið fjölmennasta býli Bárðardals.

„Það var stóri vinningurinn í happadrættinu,“ segir Elín Baldvinsdóttir húsfreyja um þá ákvörðun tveggja dætra hennar, Guðrúnar og Sigurlínu Tryggvadætra, og eiginmanna þeirra, Hlina Jóns Gíslasonar og Magnúsar Skarphéðinssonar, að taka við búskap í Svartárkoti þegar stefndi í að jörðin færi í eyði.

Systurnar í Svartárkoti, Sigurlína og Guðrún Tryggvadætur.Arnar Halldórsson

„En þau þurfa líka að hafa fyrir því. Maður þarf að hafa fyrir lífinu þegar maður býr á svona stað,“ segir Elín.

Það vakti þjóðarathygli þegar Guðrún, fyrst kvenna, varð formaður Bændasamtaka Íslands. Hún ræðir líka þá lífsreynslu að vera felld í formannskjöri.

Guðrún ásamt eiginmanninum, Hlina Gíslasyni, við heita pottinn. Fyrir aftan liðast Svartá. Fjær má sjá jaðar Ódáðahrauns. Í góðu skyggni má einnig sjá Herðubreið, Dyngjufjöll, Trölladyngju og Bárðarbungu úr heita pottinum.Arnar Halldórsson

Sonurinn, Tryggvi Snær Hlinason, er einnig búinn að gera garðinn frægan - sem landsliðsmaður og atvinnumaður í körfuknattleik.

Svo skemmtilega vill til að Tryggvi Snær, þá 15 ára gamall, var meðal viðmælenda í þætti Um land allt úr Bárðardal árið 2013, en þann þátt má nálgast í gegnum Stöð 2 Maraþon. Þá var hann spurður hvað hann ætlaði að verða þegar hann yrði stór.

Börnin í Bárðardal í viðtali í þættinum árið 2013. Þrjú barnanna eru úr Svartárkoti og birtast aftur í þættinum á mánudagskvöld. Á þessum tíma hafði Tryggvi Snær aldrei æft körfubolta.Baldur Hrafnkell Jónsson

„Mjög líklega bóndi hérna í Svartárkoti,“ var svar hans þá en á þeim tíma hafði hann aldrei iðkað æfingar hjá íþróttafélagi.

Núna siglum við með Tryggva og móður hans út á Svartárvatn þar sem mæðginin leggja silunganet. Um leið ræðum við um þessa ótrúlegu sögu en aðeins liðu þrjú og hálft ár frá því Tryggvi fór á sína fyrstu körfuboltaæfingu hjá Þór á Akureyri þar til hann var orðinn atvinnumaður í greininni.

Tryggvi Snær leikur sér á sæþotu á Svartárvatni. Sellandafjall og Bláfjall í baksýn, sem Tryggvi kallar Svartárkotsfjöllin.Arnar Halldórsson

Við heyrum einnig um ástarævintýrið í landsliðsferðinni þegar hann kynntist kærustu sinni, Sunnevu Dögg Robertson, landsliðskonu í sundi, ræðum við þau um lífið á Spáni og spyrjum hvort hann stefni enn á að verða bóndi í Bárðardal þegar körfuboltaferlinum lýkur.

Hér má sjá kynningarstiklu þáttarins um Svartárkot:

Um land allt Þingeyjarsveit Körfubolti Spænski körfuboltinn Landbúnaður