Syngur um konuna sem fannst látin í Ísdalnum

Snorri Helgason hefur sent frá sér lagið Gleymdu mér. Það er hluti af sýningunni Útlendingurinn - Morðgáta, sem fjallar um ráðgátuna um konuna sem fannst látin í Ísdalnum í Noregi fyrir um hálfri öld síðan. Sýningin verður frumsýnd á Litla sviðinu í Borgarleikhúsinu í kvöld.

Útlendingurinn er skandinavískt raunsæisglæpadrama þar sem mál „Ísdalskonunnar“ er nálgast á frumlegan hátt og nýjar kenningar dregnar fram í dagsljósið.

Friðgeir Einarsson og Snorri Helgason eru flytjendur í verkinu, Friðgeir er jafnframt höfundurinn og Snorri semur tónlistina. Þetta er annað verkið frá sama listræna teymi og setti upp verðlaunasýninguna Club Romantica, í þessum ráðgátuþríleik.

Mál konunnar í Ísdalnum hefur á síðustu árum orðið eitt þekktasta óupplýsta lögreglumál Norðurlandanna.

Nakið og illa brunnið lík fannst í stórgrýtisurð rétt utan við miðbæ Bergen. Allar vísbendingar um hver konan er höfðu verið fjarlægðar. Í áratugi hefur enginn náð að þoka málinu áfram.

Vísir fjallaði ítarlega um málið í samstarfi við NRK fyrir nokkrum árum og má lesa þá umfjöllun í hlekknum hér fyrir neðan.

„Ferlið að verkinu hófst þegar Friðgeir Einarsson flutti til Bergen, en hann heillast af ráðgátunni og gerir sitt besta til að upplýsa hana. En kannski ekki á þann hátt sem búast hefði mátt við. Friðgeir er hvorki lögreglumaður, né með reynslu af rannsóknarstörfum, en telur sig hafa ákveðna innsýn inn í hugsunarhátt konunnar. Hann er jú aðkomumaður, rétt eins og hún var,“ segir í tilkynningu frá Borgarleikhúsinu.

Leikstjórn er í höndum Péturs Ármannssonar. Brynja Björnsdóttir hannaði leikmynd og búninga. Pálmi Jónsson hannaði lýsingu og Þorbjörn Steingrímsson gerði hljóðmynd verksins.