Dorsett laus úr sóttkví: Heyrði af því að enska landsliðið vilji komast í Bláa lónið

Ísland og England mætast í Þjóðadeildinni á Laugardalsvellinum á morgun og vanalega væri hér allt morandi í enskum fjölmiðlamönnum. Kórónuveiran og mjög skert aðgengi að liðunum varð hins vegar til þess að aðeins örfári lögðu á sig vesenið að koma til Íslands.

Einn af þeim er Rob Dorsett á Sky Sports sem er búinn með sóttkví og klár í að fjalla um leikinn.

Henry Birgir Gunnarsson ræddi við Rob Dorsett um fyrstu dagana á Íslandi og leikinn við Englendinga á morgun.

„Það hefur verið krefjandi fyrir mig. Við þurftum að vera í sóttkví í fimm eða sex daga og vorum fastur upp á hótelherbergi. Við þurftum að taka stóra ákvörðun um það hvort við ættum að koma til Íslands yfir höfuð,“ sagði Rob Dorsett sem gat ekki sleppt þessu.

„Ég vissi hversu falleg borg Reykjavík væri og vildi endilega koma því allir vinirnir mínir höfðu sagt mér frá því. Bílferðin frá flugvellinum á hótelið var mjög falleg en svo sáum maður bara hótelveggina í fimm daga,“ sagði Rob Dorsett og það reyndi á hann næstu dagana.

Borðuðum ekki mikið fyrstu þrjá dagana

„Það var erfitt að fá mat. Við vorum á yndislegu hóteli en þau þurftu að loka veitingastaðnum sínum vegna kórónuveirunnar. Það var heldur engin herbergisþjónusta sem við vissum ekki fyrr en við komum hingað. Við fengum símanúmer hjá fullt af veitingastöðum á svæðinu en flestir þeirra sendu ekki matinn. A-ha vefsíðan tekur síðan ekki við ensku kreditkorti. Við borðuðum því ekki mikið fyrstu þrjá dagana,“ sagði Rob Dorsett.

„Það er allt í lagi núna því við erum búnir að fara í seinna prófið og erum frjálsir núna. Við fáum því loksins að skoða Reykjavík sem er fallegur staður,“ sagði Rob Dorsett.

Henry Birgir spurði Rob Dorsett hvað hafi verið það fyrsta sem hann gerði þegar hann slapp úr sóttkví.

„Við fengum okkur bjór á veitingastað sem var 50 metrum frá hótelinu,“ sagði Rob Dorsett hlæjandi.

Ætla að prófa alla veitingastaðina í kringum hótelið

„Hótelið okkar er í miðbænum og það er allt fullt af veitingastöðum í kringum okkur. Við munum prófa þá alla áður en við förum aftur heim,“ sagði Rob Dorsett.

Enska landsliðið verður á Íslandi fram á þriðjudaginn og mun æfa á Íslandi á mánudagsmorguninn áður enn liðið fer til Danmerkur.

„Við vorum að heyra eitthvað af því að enska landsliðið ætlaði í Bláa lónið ef þeir fá eitthvað frí en ég veit ekki hvort þeir hafi tíma til þess. Það er öruggt að leikmennirnir vilja það,“ sagði Rob Dorsett.

Henry Birgir spurði Rob Dorsett hvort ensku fjölmiðlamennirnir væru mikið að velta sér ennþá upp úr sigri Íslands á Englandi á EM 2016.

Enska landsliðið mun taka leikinn mjög alvarlega

„Það er mjög slæm minning fyrir okkur og kostaði Roy Hodgson landsliðsþjálfarastarfið. Stuðningsmennirnir ykkar voru stórkostlegir í þeirri keppni. Víkingklappið er enn stóra minningin mín frá mótinu. Þessi leikur er samt mjög slæm minning fyrir enska fótboltaáhugamenn,“ sagði Rob Dorsett.

„Ég veit að það vantar mikið í íslenska landsliðshópinn núna þar sem fimm af bestu leikmönnum íslenska liðsins eru ekki með. Enska landsliðið ætlar samt sem áður að taka þennan leik mjög alvarlega og þeir hafa áhyggjur af enska landsliðinu,“ sagði Rob Dorsett.

„Enska landsliðið hefur ekki spilað í tíu mánuði og Gareth Southgate sá að tap á móti Íslandi kostaði Roy Hodgson landsliðsþjálfarastarfið. Ég lofa þér því að hann mun taka þennan leik mjög alvarlega,“ sagði Rob Dorsett.

Það má sjá allt viðtalið við hann hér fyrir neðan.

Fréttin hefur verið uppfærð með viðbrögðum AHA.is.