Hundruð milljóna, betri HM-möguleikar og titill í húfi í Þjóðadeildinni

Háar fjárhæðir, von um auðveldari riðil í undankeppni HM, og vissulega titill, er meðal þess sem er í húfi þegar Ísland hefur keppni í Þjóðadeild UEFA í fótbolta á laugardaginn.

Þjóðadeildin, sem innleidd var til að fækka vináttulandsleikjum, er svo ný af nálinni að eflaust spyrja margir sig hvort og þá hvaða máli hún skipti. Hér verður gerð tilraun til að svara því.

Ísland mætir Englandi á Laugardalsvelli á laugardag og því næst Belgum ytra á þriðjudag. Í október leikur liðið á heimavelli við Danmörku og Belgíu, og loks á útivelli gegn Danmörku og Englandi í nóvember þegar riðlakeppni Þjóðadeildarinnar lýkur.

Þetta er í annað sinn sem Þjóðadeildin fer fram og aftur er Ísland á meðal bestu þjóða Evrópu í A-deild. Þannig er staðan þrátt fyrir að Ísland hafi tapað leikjum sínum gegn Belgíu og Sviss í síðustu keppni, haustið 2018, en ákveðið var að fjölga liðum í A-deild úr 12 í 16 og því féll ekkert lið niður í B-deild.

Undirbúningur fyrir EM-umspilið

Þökk sé lokastöðu Íslands í síðustu Þjóðadeild komst liðið í umspil fyrir næsta EM, umspil sem einnig verður útkljáð í október og nóvember. Ljóst er að Erik Hamrén horfir einmitt fyrst og fremst á leikina við England og Belgíu sem undirbúning fyrir umspilsleikinn við Rúmeníu, og þess vegna er hann óánægður með að hafa ekki Gylfa, Aron, Jóhann, Alfreð, Ragnar og Rúnar Má til taks.

Gylfi, Jóhann og Alfreð gáfu ekki kost á sér í Þjóðadeildarleikina og þegar horft er til þess sem er í húfi í sjálfri keppninni er það kannski ekki skrýtið. Umspilsleikirnir eru alla vega langtum mikilvægari og aðalatriðið að þeir verði klárir í slaginn 8. október.

Mikilvægt að safna stigum á heimslista

Þjóðadeildin nú mun hafa mun minni áhrif á undankeppni HM 2022 en hún hafði á undankeppni EM. Tvö lið komast í HM-umspil í gegnum Þjóðadeildina og þurfa að hafa unnið sinn riðil, eins og nánar er fjallað um í greininni hér að neðan.

Aftur á móti er mikilvægt fyrir Ísland að ná góðum úrslitum í Þjóðadeildinni því það skilar stigum á heimslista FIFA. Staðan á heimslista í nóvember, þegar riðlakeppni Þjóðadeildarinnar lýkur, ræður styrkleikaflokkunum þegar dregið verður í undankeppni HM.

Eftir að hafa farið úr 131. sæti heimslistans alla leið upp í 18. sæti á árunum 2012-2018, féll Ísland hratt niður listann og er nú í 39. sæti. Það sem skiptir meira máli er að Ísland er í 24. sæti af Evrópuþjóðunum, og yrði því í 3. styrkleikaflokki fyrir HM-dráttinn eins og staðan er núna. Ísland þyrfti að fara upp um fjögur sæti til að komast í 2. styrkleikaflokk, eða falla niður um sjö sæti til að vera í 4. flokki.

Fá kvartmilljón meira fyrir að vera í A-deild en D-deild

Fyrir utan tækifærið til að spila við bestu landslið heims þá er kannski stærsti kosturinn við að spila í A-deild að það tryggir KSÍ hærra vinningsfé en að vera í lægri deild. Í síðustu Þjóðadeild fengust alla vega á endanum 2,25 milljónir evra bara fyrir það að vera í A-deild, sem í dag jafngildir 370 milljónum króna.

Liðin í B-deild fengu 1,5 milljón evra, liðin í C-deild 1,125 milljón evra, og liðin í D-deild fengu þriðjung af því sem að Ísland fékk eða 750.000 evrur. Lið sem að unnu sinn riðil fengu þó tvöfalda upphæð, þannig að með því að vinna riðil í C-deild fékkst sama upphæð og fyrir að vinna ekki riðil í A-deild.

Englendingar fengu brons síðast

Sigurvegarar riðlanna í A-deild komast í úrslitakeppni Þjóðadeildarinnar sem áætlað er að fari fram í september eða október á næsta ári. Ljóst er hins vegar að það mun taka lengri tíma fyrir UEFA að fá fólk til að líta á Þjóðadeildina sem „þriðja stórmótið“.

Cristiano Ronaldo og félagar í portúgalska landsliðinu unnu fyrsta Þjóðadeildarmeistaratitilinn í fyrra, með sigri á Hollandi í úrslitaleik, og fékk portúgalska knattspyrnusambandið alls 10,5 milljónir evra í verðlaunafé. Englendingar, andstæðingar Íslands á laugardaginn, urðu í 3. sæti síðustu keppni.