Engin skömm í að vera berskjölduð og þurfa stuðning

„Ég er alltaf að prófa eitthvað nýtt og held áfram að þróa minn stíl og hljóm. Á Close má finna ný hljóðfæri sem ég hef ekki notað áður eins og saxófón og ashiko handtrommur sem gefur laginu þennan einkennandi og áberandi hljóm,“ segir tónlistarkonan Sjana um nýja lagið sitt sem kom út á Spotify í dag. Innblásturinn kom úr ýmsum áttum, þar á meðal úr frumskóginum, en var samið á nokkrum mínútum.

„Ég hef alltaf verið mikill Phil Collins aðdáandi og þá sérstaklega af lögunum í Tarzan, sem er ein af mínum uppáhalds teiknimyndum. En þar notar hann afrískar trommur sem gefa lögunum skemmtilegan og ævintýralegan „frumskógar” hljóm. En ég hlusta á allskonar tónlist.“

Berskjölduð og heiðarleg

Sjana hefur glímt við mikinn kvíða og samdi oft lög á nóttunni þegar hún gat ekki sofið. Hún samdii textann við lagið Close sjálf en hún kafar mjög djúpt í eigin tilfinningar á væntanlegri plötu sinni.

„Close var skáldsaga til að byrja með. Ég hafði skýra mynd í huganum um tvo elskendur sem aðskiljast vegna stríðsátaka sem leita svo að hvort öðru, en núna hefur lagið persónulegri merkingu. Eftir það sem ég hef upplifað og gengið í gegnum undanfarið, finnst mér lagið vera meira um það að þurfa ekki að skammast sín eða óttast það að láta fólkið í kringum sig vita að þú þarft á þeim, og stuðningi þeirra að halda. Það geta allir túlkað lagið á sinn hátt.“

Lagið samdi hún í byrjun 2019 á svokallaða „loop station” og grínast hún með að kannski hafi lagið ómeðvitað fengið innblástur frá Tarzan teiknimyndinni.

„Listagyðjan kom yfir mig og ég var í skemmtilegum gír þennan dag og byrjaði að glamra á hljómborðið og valdi nokkur hljóðfæri til að setja saman og byrjaði svo að radda. Lagið varð til á nokkrum mínútum — ásamt nokkrum öðrum. Ég veit ekki alveg nákvæmlega hvaðan innblásturinn kom en svona varð í raun lagið bara til. “

„Close setur tóninn fyrir bæði plötuna og nýja tíma, en platan verður á ensku og það verða einnig öðruvísi lög á plötunni. Það verða önnur hljóðfæri og hljóð, ég kafa dýpra í hluti sem ég hef ekki þorað að tjá mig um áður og er ég mjög berskjölduð og heiðarleg á plötunni. Platan einkennist af töffaraskap, heiðarleika og styrk. Ég tjái mig um það erfiða ferli sem ég gekk í gegnum að finna sjálfa mig og vinna mig út úr þeim áföllum sem ég varð fyrir. Eins og áður er mikið af lögum sem hafa setið lengi í geymslu sem fá nú að líta dagsins ljós, mín allra persónulegustu lög.“

Það hefur ekki verið mikið að gera hjá tónlistarfólki síðustu mánuði vegna heimsfaraldurs en Sjana hefur nýtt þennan tíma í sjálfsvinnu.

„Ég hef verið að skipuleggja næstu skref bæði í tónlistinni og myndlistinni. Ég hef einnig nýtt tímann í að fara yfir gömul lög og að skapa meira. Ég er einbeitt og mjög jákvæð á framtíðina og hlakka mikið til þeirra verkefni sem ég er að vinna í og sem ég á eftir að taka að mér. Það er margt spennandi fram undan sem ég hlakka til að deila með fólki. Þetta er upphafið á nýju tímabili.“

Hægt er að hlusta á lagið Close í spilaranum hér fyrir neðan.