„Konur eru konum bestar“ færðu Krafti 3,7 milljónir

Góðgerðarverkefnið Konur eru konum bestar gekk vonum framar í ár og söfnuðust 3,7 milljónir fyrir Kraft, stuðningsfélag fyrir ungt fólk með krabbamein og aðstandendur. Elísabet Gunnarsdóttir, Andrea Magnúsdóttir, Rakel Tómasdóttir, Nanna Kristín Tryggvadóttir og Aldís Pálsdóttir standa fyrir verkefninu og færðu þær Huldu Hjálmarsdóttur framkvæmdastjóra Krafts ágóðann af sölu bolanna.

„Þakklæti er mér efst í huga eftir þessa góðu morgunstund sem gaf svo sannarlega jólahlýju í hjartað. Takk til allra sem eruð með okkur í þessu verkefni sem hefur stækkað og þróast svo fallega síðustu  þrjú árin og mun halda áfram árlega átaki sínu næstu árin,“ segir Elísabet í færslu á Trendnet. 

Verkefnið var haldið í þriðja sinn á þessu ári og vildu þær bæði styrkja gott málefni og hvetja konur til meiri samstöðu í leiðinni. Á bolum sem framleiddir voru fyrir þetta verkefni er skrifað Konur eru konum bestar. Í ár var einnig teikning eftir Rakel Tómasdóttur á bakinu en hún notar mikið kvenlíkamann í sínum verkum.  

Klappliðið stækkar hratt

„Við höfum valið mismunandi félög og málefni til að styrkja við hverju sinni og í ár þurftum við ekki  að hugsa okkur tvisvar um áður en við völdum félag til að létta undir. Kraftur hefur átt sérstaklega skrítið ár 2019 og margir félagar fallið frá, allt of ungir að árum, það hlýjar því innst að hjartarótum að geta látið gott af  sér leiða og  gefið eitthvað í þetta óeigingjarna starf sem  þarna er unnið,“ segir Elísabet. Eins og kom fram á Vísi í haust þekkir Elísabet persónulega tvær fjölskyldur sem þurftu að kveðja ungan ástvin vegna krabbameins í sumar. 

Konur eru konum bestar bolurinn var seldur í versluninni AndreA á Norðurbakkanum í Hafnarfirði. Löng röð myndaðist þegar bolurinn fór í sölu og var hann svo einnig seldur í vefverslun.

„Þetta gleður bara meira og meira með hverju árinu sem líður og það er á hreinu að klappliðið stækkar hratt og örugglega. Líklega þurfum við stærra húsnæði til að halda þetta í að ári,“ segir Elísabet ánægð í samtali við Vísi.

Árið 2017 var verkefninu hrundið af stað og söfnuðu þær þá einn milljón fyrir Kvennaathvarfið. Árið 2018 völdu þær að styrkja Menntunarsjóð Mæðrastyrksnefndar og söfnuðu þá 1,9 milljón. Í ár söfnuðu þær svo eins og áður sagði 3,7 milljónum til styrktar Krafts.