Eigandi hússins á Dalvík telur McAfee vera að afvegaleiða fólk

Eigandi hússins á Dalvík þar sem velt er upp hvort eftirlýstur tæknifrumkvöðull hafi dvalið í felum segir það hreinlega ekki geta verið. Hún veltir því fyrir sér hvort verið sé að villa um fyrir þeim sem vilja hafa hendur í hári Bandaríkjamannsins.

Það vakti athygli fyrir helgi þegar John McAfee, stofnandi vírusvarnarforrits sem kennt er við hann, greindi frá því á Twitter að komið hefði verið upp um dvalarstað hans. McAfee nefndi veitingastaðinn Gregor's í færslu á samfélagsmiðlinum en samnefnt veitingahús er rekið á Dalvík.

Milljarðamæringur á flótta

Tæknifrumkvöðullinn John McAfee, sem er hvað þekktastur fyrir að hafa stofnað McAfee vírusvarnarfyrirtækið, hefur verið á flótta frá 2012 þegar hann var sakaður um að hafa skotið nágranna sinn í Belís til bana. Hann er einnig sakaður um umfangsmikil skattsvik í Bandaríkjunum.

McAfee hvarf af sjónarsviðinu í sumar eftir að hann var handtekinn í Dóminíska lýðveldinu. Þá var hann ásamt öðrum á ferð í snekkju og fundust þar um borð skotvopn, skotfæri og „hergögn“. Eftir að honum var sleppt sagði McAfee á Twitter að hann ætlaði sér að fara huldu höfði um tíma og sagðist hann vera í Litháen.

Nú á dögunum kom þó í ljós að McAfee hafi þurft að flytja á nýjan leik og sagði hann á Twitter að það væri vegna þess komið hafi verið upp um felustað hans og eiginkonu hans.

Áhugasöm um McAfee

Friðrika Árnadóttir er eigandi húss á Dalvík sem hýsir bæði veitingastaðinn Gregors og íbúð þar sem talið var að McAfee dveldi. Sú heimild um að hann hafi dvalið í húsinu verður seint talin traust.

Twitter-notandinn Adam Guerbuez birtir mynd af húsinu á Twitter þar sem ör er beint að glugga á efstu hæð hússins. McAfee grípur boltann á lofti og segir að upp sé komið um dvalarstað hans.

Friðrika hafði kynnt sér málið nokkuð vel þegar blaðamaður heyrði í henni hljóðið í dag. Sýndi hún McAfee mikinn áhuga og tjáði blaðamanni að heimildarmynd hefði verið gerð um kappann sem hún ætlaði sér sannarlega að sjá.

Hins vegar væri nær útilokað að hann hefði dvalið í hennar húsakynnum.

Ekki séns

„Þetta er rosalega skrýtið, ég skil þetta ekki alveg. Það er ekki séns að hann hafi verið á Goðabrautinni,“ segir Friðrika sem er sjálf búsett í Danmörku.

Veitingastaðurinn Gregors er á neðstu hæðinni. Þar fyrir ofan tvær íbúðir sem hún leigi út í langtímaleigu. Á efstu hæðinni sé rými með alls kyns dóti og drasli. Ekkert rúm eða neitt svoleiðis.

„Hann myndi aldrei geta hafa komist niður án þess að rekast á fólk,“ segir Friðrika. Sameiginlegur inngangur sé í rýmin í risinu og hjá fólkinu á efri hæðinni.

Hún hafi líkt og blaðamaður fyrir helgi rætt við Gregorz, sem reki veitingastaðinn á jarðhæðinni, og hann kannist heldur ekki við neitt.

Líkur á að McAfee sé að plata

Friðrika veltir því upp sem margir velta eflaust fyrir sér. Hvort McAfee hafi nokkuð verið á Íslandi og hvað þá í þessari íbúð. Hvort hann sé ekki bara að villa fyrir þeim sem vilji ná í skottið á honum.

„Getur ekki verið að hann sé að blöffa? Afvegaleiða þá sem eru að leita að honum?“ spyr Friðrika. Eðlileg vangavelta.

„Hann er í felum en segir að hann sakni Gregorz. Það er engin lógík í þessu.“

Hún skilji þó vel að matnum hjá Gregorz sé hrósað enda fyrsta flokks.

Ekki hafa komið fram neinar upplýsingar, utan þeirra sem tengjast McAfee sjálfum á Twitter, að hann hafi verið hér á landi.