Opinská og einlæg í viðtali hjá Independent: „Ég þurfti að læra að elska sjálfa mig og líkama minn“

Íslenska söngkonan Sara Pétursdóttir, betur þekkt sem Glowie, opnar sig um reynslu sína af því að vera þolandi eineltis og nauðgunar í opinskáu viðtali við breska blaðið Independent.

Glowie gaf út plötuna Where I belong þann 14. júní síðastliðinn en á plötunni eru átta lög. Líkamsvirðing er fyrirferðarmikið þema á plötunni en málefnið er henni afar hugleikið því það tók hana langan tíma að taka líkama sinn í sátt eftir erfiðleika í æsku.

„Ég var lögð í einelti í skólanum af því ég þótti of horuð,“ segir Glowie í samtali við Independent. Hún segist hafa grennst mikið vegna kvíða sem síðan jókst með eineltinu.

„Ég missti matarlystina í nokkra mánuði og léttist mjög hratt. Það var þá sem eineltið versnaði til muna af því ég leit næstum því út eins og beinagrind.“

 

 

 

View this post on Instagram

I met up with @lnwyco in London to talk about my passions and inspirations

A post shared by Glowie (@itsglowie) on Jun 17, 2019 at 12:42pm PDT

Glowie opnaði sig um kynferðisofbeldi í viðtalinu.

„Mér var nauðgað þegar ég var unglingur. Stundum gleymi ég að fólki gæti þótt óþægilegt heyra það.“

Hún segir að það hafi haft hræðileg áhrif á sjálfsmyndina að vera notuð eins og kynlífstæki.

„Ég hataði þetta. Mér leið eins og verið væri að nota mig. Þetta er bara ógeð – og manni líður eins og maður sér ógeðslegur. Það er hræðileg, hræðileg tilfinning.“

Hún segir að tónlistin hafi hjálpað sér að vinna sig úr erfiðum tilfinningum sem blossuðu upp eftir kynferðisofbeldið. Eitt laganna á nýju plötunni fjallar um þá góðu tilfinningu sem hlýst af því þegar þolandi kynferðisofbeldis nær áfangasigri í sínu bataferli.

 

 

 

View this post on Instagram

My new #WhereIBelong EP is out today! This is a collection of songs that are very different but they all tell you a little bit about me. I feel really passionate about each and every song on this EP and I can’t wait to hear your thoughts on it. Link to listen in full is in my bio and my stories as always Let me know which song is your favourite in the comments

A post shared by Glowie (@itsglowie) on Jun 14, 2019 at 12:27am PDT

Glowie segist hafa fundið innblástur í tíma hjá sálfræðingnum sínum. Skyndilega hafi hún fundið að hún gæti loksins andað léttar og farið að byggja upp sjálfstraustið að nýju. „Ég þurfti að læra að elska sjálfa mig og líkama minn.“

Glowie segir að það hafi tekið hana drjúgan tíma að geta opnað sig um ofbeldið. Hún hafi þó fljótlega áttað sig á því kynferðisofbeldi eigi alls ekki að liggja í þagnargildi.

„Ég vil bara fá að vera ég sjálf. Ég vil geta talað um erfiða hluti. Það hjálpar mér að græða sárin og styrkir mig,“ segir Glowie sem bendir á að þannig öðlist aðrir styrk til að segja frá því sem liggur þungt á þeim.

Það sé hennar sannfæring að það besta sem hægt sé að gera þegar fólk hefur orðið fyrir hvers konar áfalli sé að opna sig og að leyfa öllu að flæða fram.

„Fólk veigrar sér oft við því að opna sig en það er svo mikill léttir sem felst í því. Þér mun líða svo miklu betur, þú verður sterkari fyrir vikið og tilbúin að horfa fram á veginn.“

Glowie segir að tónlistin sé frábært verkfæri til að koma skilaboðum áleiðis og til að vekja umræðu um málefni af ýmsum toga. Líkamsvirðing og eignarhald yfir eigin líkama eru málefni sem eru henni sérstaklega hugleikin.

„Ég held að hlutirnir séu að þróast í rétta átt en á sama tíma finnst mér það gerast of hægt. Ég hugsa að það muni líða langur tími þar til við förum að sjá einhvern árangur,“ segir Glowie.

Glowie er búsett í Lundúnum en í fyrra skrifaði hún undir samning við útgáfurisann Columbia. Hún mun hita upp á tónleikum Ed Sheeran á Laugardalsvelli 10. og 11. ágúst í sumar.

 

 

 

View this post on Instagram

I never thought I’d be writing these words, but I’m going to be supporting the incredible Ed Sheeran @teddysphotos in Iceland in August. This is a dream come true for me and I’m so excited!

A post shared by Glowie (@itsglowie) on May 31, 2019 at 7:34am PDT