Svona fagna Finnar heimsmeistaratitli

Finnar urðu heimsmeistari í íshokkí eftir að hafa lagt Kanadamenn að velli 3-1 í úrslitaleik í Bratislava í Slóvakíu um helgina að viðstöddum ríflega 9 þúsund áhorfendum.

Kanadamenn komust yfir snemma leiks og leiddu eftir fyrsta leikhluta en í öðrum leikhluta jöfnuðu Finnar metin með marki Marko Anttila.

Hann var aftur að verki í upphafi þriðja leikhluta og kom Finnum í 2-1. Harri Pesonen gerði svo út um leikinn skömmu fyrir leikslok og tryggði Finnum heimsmeistaratitilinn.

Þetta er í þriðja sinn í sögunni sem Finnar verða heimsmeistarar í íshokkí og það varð hreinlega allt vitlaust í Finnlandi.

Á YouTube-síðunni Timo Wilderness má sjá rúmlega þriggja mínútna myndband þar sem er búið að klippa saman fimm klukkustunda fagnaðarlæti í Finnlandi og hvernig þeir gera hlutina þegar landsliðið verður heimsmeistari.

Það má með sanni segja að þeir fari alla leið eins og sjá má hér að neðan.