Internetgoðsögnin Grumpy cat er öll

Grumpy cat, læðan fúllynda sem vann hug og hjörtu netverja með skeifu sinni, er dauð. Í yfirlýsingu eigenda hennar segir að hún hafi drepist á þriðjudag, sjö ára að aldri.

Banameinið er sagt fylgikvillar aðgerðar sem hún gekkst undir vegna þvagfærasýkingar. Hún drapst í faðmi fjölskyldu sinnar í Arizona í Bandaríkjunum.

Frægðarsól Grumpy cat, sem gekk í raun undir nafninu Tardar Sauce, reis hratt árið 2012 eftir að myndum af henni með fýlusvip var dreift á netinu. Umræddur fýlusvipur, sem var viðvarandi á andliti læðunnar, var af völdum dvergvaxtar.

Grumpy cat naut mikillar hylli og var tíður gestur á sjónvarpsskjám vestanhafs. Hún státar af yfir tveimur milljónum fylgjenda á Instagram og vaxstytta af henni var afhjúpuð árið 2015 á Madame Tussauds-safninu í San Fransisco.

Some days are grumpier than others... pic.twitter.com/ws209VWl97

— Grumpy Cat (@RealGrumpyCat) May 17, 2019