Áhugi fyrir því að halda Secret Solstice í Ölfusi

Bæjarstjóri Ölfuss segir að áhugi væri fyrir því að halda tónlistarhátíðina Secret Solstice í sveitarfélaginu, ef leitað yrði til bæjarstjórnar með hugmyndir um slíkt. Aðrir bæjar- og sveitarstjórar í nágrannasveitarfélögum Reykjavíkurborgar eru ekki jafnáhugasamir. Enginn bæjar- og sveitarstjóra sem Vísir ræddi við vissi til þess að skipuleggjendur Secret Solstice hefðu leitað til þeirra um að hýsa hátíðina.

Forsvarsmenn Live Events, fyrirtækisins sem fer nú með rekstur Secret Solstice, hyggjast halda hátíðina í sumar óháð stuðningi Reykjavíkurborgar, að því er fram kemur í yfirlýsingu sem send var út í morgun. Segja þeir meintar milljónaskuldir hátíðarinnar við Reykjavíkurborg og umboðsaðila rokksveitarinnar Slayer á ábyrgð fyrri rekstraraðila.

Sjá einnig: Ætla að halda Secret Solstice óháð stuðningi borgarinnar og tíu milljóna skuld



Secret Solstice hefur verið haldin í Laugardalnum undanfarin ár en njóti hátíðin ekki stuðnings borgarinnar má ætla að leita þurfi á náðir annars sveitarfélags. Víkingur Heiðar Arnórsson framkvæmdastjóri Live Events sagði í samtali við Vísi í morgun að ekki væri tímabært að segja til um það hvar hátíðin yrði haldin í sumar ef leita þurfi annað. Jón Bjarni Steinsson upplýsingafulltrúi Secret Solstice hefur sagst viss um að önnur sveitarfélög taki við keflinu af borginni ef þess þarf.

Ekki bjartsýnn á Solstice á Selfossi

Enginn bæjarstjóri bæjarfélaga á höfuðborgarsvæðinu, þ.e. Garðabæjar, Kópavogs, Hafnarfjarðarbæjar, Mosfellsbæjar og Seltjarnarness, vissi til þess að skipuleggjendur Secret Solstice hefðu leitað til bæjarstjórnar um að hýsa hátíðina.

Þá var svipað hljóðið í öllum bæjarstjórunum varðandi það hvort áhugi væri fyrir því að halda Secret Solstice í bæjarfélögunum: allar slíkar hugmyndir yrðu skoðaðar, þegar og ef til þess kæmi.

Bæjarstjórar á Suðurnesjum tóku í sama streng en skipuleggjendur Secret Solstice hafa ekki haft samband við Suðurnesjabæ, Reykjanesbæ, Grindavíkurbæ eða Sveitarfélagið Voga, að bæjarstjórunum vitandi. Tillögur um að halda hátíðina í bæjunum þyrfti jafnframt að skoða áður en ákvarðanir yrðu teknar.

Helgi Sigurður Haraldsson forseti bæjarstjórnar á Selfossi kannaðist enn fremur ekki við það að hugmyndir um Secret Solstice í Árborg hefðu komið inn á borð bæjarstjórnar. Aðspurður sagði hann það fara eftir umgjörð og öryggi hvort tekið yrði til greina að halda Secret Solstice í bæjarfélaginu en var þó ekki bjartsýnn.

„Eins og umræðan hefur verið tel ég ekki miklar líkur á því.“

Ölfus myndi skoða hugmyndina með opnum hug

Aldís Hafsteinsdóttir bæjarstjóri Hveragerðisbæjar kannaðist ekki við að rætt hefði verið við bæjarstjórn þar í bæ um að halda Secret Solstice.

Hið sama var uppi á teningnum hjá Elliða Vignissyni, bæjarstjóra Sveitarfélagsins Ölfusar, en hann tók þó aðspurður vel í hugmyndina.

„Þetta hefur ekki komið til okkar með formlegum hætti, en ég get staðfest að sveitarfélagið Ölfus  myndi sýna því áhuga ef til þeirra yrði leitað,“ sagði Elliði.

Hann sagði þó ekki heldur hafa verið leitað til sveitarfélagsins með óformlegum hætti.

„Nei, ekki annað en það að auðvitað höfum við áhuga á því að styðja við menningu og listir. […] Það er alveg eins með Secret Solstice og önnur atvinnutækifæri eða tækifæri á sviði menningar og lista að við myndum skoða það með opnum huga.“

Ekki hefur náðst í Þórdísi Lóu Þórhallsdóttur formann borgarráðs vegna Secret Solstice í dag þrátt fyrir ítrekaðar tilraunir. Hún sagði í kvöldfréttum RÚV í fyrradag að málið verði tekið fyrir í borgarráði á fimmtudag.

Víkingur Heiðar Arnórsson framkvæmdastjóri Live Events segir í skriflegu svari við fyrirspurn Vísis um mögulegar staðsetningar fyrir hátíðina að beðið sé eftir viðbrögðum Reykjavíkurborgar. Ekki fást því frekari upplýsingar um staðsetningu hátíðarinnar í sumar fyrr en svör liggja fyrir frá borginni.