Markmið aðgerðanna er að ná samningum

„Meginmarkmiðið með þessu öllu saman er auðvitað fyrst og fremst að reyna ná samningum. Við vonumst til að þetta aðgerða­plan bíti það fast að við fáum samningsaðila að borðinu,“ segir Ragnar Þór Ingólfsson, formaður VR, um áætlun um fyrirhugaðar verkfallsaðgerðir.

VR og Efling birtu í gær aðgerðaáætlun um næstu aðgerðir félaganna. Eins og fram hefur komið er aðgerðunum beint gegn stórum aðilum í ferðaþjónustu. Þannig munu starfsmenn félaganna hjá hópbifreiðafyrirtækjum og tilgreindum hótelum fara í verkföll.

Verði aðgerðirnar samþykktar í atkvæðagreiðslu og ekki takist samningar í tíma er um að ræða sólarhrings verkfall 22. mars en síðan tæki við tveggja sólarhringa verkfall í lok mars og fjögur þriggja sólarhringa verkföll í apríl. Ótímabundið verkfall tæki svo við frá 1. maí.

Ragnar Þór segist gera ráð fyrir því að atkvæðagreiðsla um aðgerðirnar hefjist snemma í næstu viku en einungis þeir starfsmenn sem aðgerðirnar munu ná til geta greitt atkvæði. Það þýðir að þátttakan þarf að lágmarki að vera 20 prósent til að atkvæðagreiðslan teljist gild.

Aðspurður segist hann ekki vera kominn með endanlegar tölur yfir fjölda félagsmanna VR sem aðgerðirnar gætu náð til en líklegast sé um yfir þúsund manns að ræða.

„Ég á ekki von á því að það verði bitist eitthvað um framkvæmdina en það má alveg búast við því að Samtök atvinnulífsins láti reyna á öll álitamál sama hver þau eru. Það hefur alltaf verið eðli ferlisins að það sé látið reyna á nánast allt fyrir Félagsdómi,“ segir Ragnar Þór.

Það þurfi að passa upp á mörg praktísk mál í þessu ferli öllu. „Við erum fyrst og fremst að reyna að gera þetta rétt og við viljum vanda okkur. Við kvörtum allavega ekki yfir aðgerðaleysi þessa dagana.“ Ragnar segir að aðilar muni hittast hjá ríkissáttasemjara næstkomandi fimmtudag þótt fundur hafi ekki formlega verið boðaður. Samkvæmt lögum þarf að halda fund innan við tveimur vikum frá því að viðræðum er slitið en sá frestur rennur út á fimmtudaginn.

Mikill meirihluti þeirra félagsmanna í Eflingu sem tóku þátt í atkvæðagreiðslu um verkfall hjá hótelþernum næstkomandi föstudag samþykktu aðgerðirnar. Af þeim 862 sem tóku þátt samþykktu 769 verkfallsboðun eða 89 prósent. Þátttaka var um ellefu prósent en Félagsdómur á eftir að skera úr um lögmæti verkfallsboðunarinnar. Er niðurstöðu að vænta um miðja næstu viku.

Sólveig Anna Jónsdóttir, formaður Eflingar, segist gríðarlega ánægð með niðurstöðuna.

„Auðvitað er alltaf gott að sjá sem mesta þátttöku en það er eðlismunur á þeirri aðferð sem við notuðum og þeim sem hafa tíðkast hér. Við settum okkur það markmið í nafni alvöru lýðræðis að tryggja það með öllum tiltækum ráðum að þær manneskjur sem myndu leggja niður störf ef til verkfalls kæmi væru þær manneskjur sem fengju tækifæri til að kjósa.“

Hún segir þennan hóp, sem sé mestmegnis samansettur af konum af erlendum uppruna, vera að senda skýr skilaboð. „Þetta er jaðarsettasti hópur vinnuaflsins á Íslandi. Það að þær sjálfar hafi gengið til atkvæða og þetta sé niðurstaðan er mjög merkilegt. Ef fólk sér það ekki þá er því ekki við bjargandi.“

Sólveig Anna segir að þeirri takt­ík­ að fara á milli vinnustaða og safna atkvæðum verði áfram beitt. Sú breyting verður þó á í tengslum við aðgerðaplanið að einungis þeir félagsmenn sem tækju þátt í verkfallsaðgerðum greiða atkvæði. Hún segist binda vonir við að aðgerðaáætlunin muni ýta við viðsemjendum.

„Ég mun samt aldrei segja það sem allir segja, að það vilji enginn fara í verkfall. Ég veit að það er ósatt. Þetta er mýta sem er líka étin upp innan verkalýðshreyfingarinnar. Þetta er ein af stóru lygunum í íslensku samfélagi.“