Dóttir Cindy Crawford kosin fyrirsæta ársins

Kaia er aðeins sautján ára en Kate Moss hefur meðal annarra hlotið þennan titil. Kaia var tilnefnd ásamt þeim Adut Akech, Adwoa Aboah, Bellu Hadid og Winnie Harlow. Kaia á ekki langan feril í módelbransanum og þess vegna þykir þetta mikill heiður fyrir hana. 

Fyrsta stóra hlutverk hennar á sviði var í september 2017, þá var hún nýorðin sextán ára, þegar hún kom fram fyrir Calvin Klein á tískuvikunni í New York. Síðan hefur hún komið víða fram, meðal annars fyrir Burberry, Versace, Alexander Wang, Marc Jacobs, Prada, Chanel, Fendi, Moschino og Valentino svo nokkrir séu nefndir. Hún hefur ekki einungis sýnt fatnað heldur kynnti hún samstarfsverkefni sitt og Karls Lagerfeld í ágúst síðastliðnum sem vakti mikla athygli.

Á tískuverðlaunahátíðinni fékk Kaia stuðning frá fjölskyldu sinni. Foreldrar hennar og bróðir voru viðstödd afhendinguna. Faðir hennar, Rande Gerber, er þekktur auðjöfur og viðskiptamógúll. Kaia var aðeins 10 ára þegar hún landaði fyrsta fyrirsætuhlutverki sínu, en þá sýndi hún barnalínu frá Versace. Þá lék hún í kvikmyndinni Sister Cities þegar hún var fimmtán ára. Kaia hefur komið fram í tískutímaritum á borð við Vogue, Teen Vogue og Pop Magazine.

Þess má geta að Meghan Markle mætti óvænt á bresku tískuverðlaunin þar sem hún afhenti Claire Keller verðlaun. Hún hannaði brúðarkjól Meghan fyrr á árinu.