Eldur í húsi á Vesturgötu

Slökkviliðsfólk frá höfuðborgarsvæðinu var ræst út vegna elds á Vesturgötu 25 vestur af miðbæ Reykjavíkur á fimmta tímanum í dag. Eldur kom upp í bakhúsi og stóð það um tíma í ljósum logum. Einn var fluttur á slysadeild vegna gruns um reykeitrun.

Samkvæmt upplýsingum frá slökkviliðinu á höfuðborgarsvæðinu náði slökkviliðið tökum á eldinum á sjötta tímanum en vinna stóð enn yfir á vettvangi skömmu eftir klukkan 18. Þá þurfti að reykræsta nærliggjandi hús. Ekki var ráðist í reykræstingu á bakhúsinu vegna smæðar þess.

Að sögn varðstjóra var einn fluttur á slysadeild vegna gruns um reykeitrun en allir voru þó komnir út úr húsinu þegar slökkvilið bar að garði. Ekki var hægt að gefa upplýsingar um eldsupptök.

Líkt og sjá má á myndbandi frá vettvangi var um nokkuð mikinn eld að ræða en bakhús stóð í ljósum logum. Þá var lokað fyrir umferð í kringum vettvang svo að viðbragðsaðilar gætu athafnað sig og sótt vatn í brunahana.

Fréttin hefur verið uppfærð.

Í spilaranum hér að neðan má sjá myndband Melkorku Ólafsdóttur frá vettvangi eldsvoðans.

Hér að neðan má sjá fleiri myndir frá vettvangi.