Búið að slökkva eldinn í Hafnarfirði

Búið er að slökkva eldinn sem kom upp í iðnaðarhúsnæði  í Vallahverfinu í Hafnarfirði í dag. Allt tiltækt slökkvilið var sent á vettvang.

Umfang eldsins reyndist minna en talið var í fyrstu. Grunur leikur á að eldurinn hafi komið upp útfrá lyftara innandyra. Eldurinn náði ekki að læsa sig í húsið sjálft.

Engin starfsemi var í húsinu þegar eldurinn kom upp. 

Slökkvilið höfuðborgarsvæðisins staðfestir í samtali við fréttastofu að búið sé að ráða niðurlögum eldsins og reykræsting standi nú yfir.

Fréttin hefur verið uppfærð, upphaflegu fréttina má lesa hér að neðan.

Eldur kom upp í iðnaðarhúsnæði í Vallahverfinu í Hafnarfirði í dag. Slökkvilið sendi dælubíla á vettvang en ekki liggur fyrir hvert umfang eldvoðans er. 

Samkvæmt slökkviliði höfuðborgarsvæðisins er eldurinn í húsnæði við Gjáhellu 11 en þar stendur Járn og blikk ehf, vélsmiðja.

Stutt er síðan að eldur kom upp í öðru iðnaðarhúsnæði í Hafnarfirði en 16. nóvember brann húsnæði Glugga- og hurðasmiðju SB við Hvaleyrarbraut.

Fréttin hefur verið uppfærð.