Búnir að dæla olíu úr skipinu

Dælingu á olíu úr sementsskipinu Fjordvik, sem strandaði við hafnargarðinn í Helguvík um liðna helgi, er lokið. Þetta segir forsvarsmaður hollenska björgunarfélagsins SMT Shipping í svari við fyrirspurn fréttastofu. 

Sérfræðingar fyrirtækisins munu í dag halda áfram útreikningum og undirbúningi vegna áætlunar fyrirtækisins um að koma skipinu aftur á flot. 

Veðurskilyrði í gær voru hagstæð sem gerði það að verkum að starfsmönnum fyrirtækisins tókst að komu öllum nauðsynlegum búnaði um borð í Fjordvik, þar á meðal dælum og slöngum.

Munu sérfræðingarnir reyna að dæla sjó úr skipinu í dag.