54 laxa holl í Affallinu

Heimtur á laxi í Affallið hafa verið með eindæmum góðar og veiðin þar síðustu daga hefur verið einstaklega góð.

Holl sem var þar við veiðar fyrir helgi fékk 54 laxa og tala veiðimenn sem hafa verið að veiða við ána að það sé mikið af laxi í henni.  "Við bætum aðeins í sleppingar í fyrra og það er greinilegt að það er að skila miklu en eins virðist sem heimtur séu betri en í fyrra og laxinn vel haldinn svo framhaldið stefnir í að verða mjög gott" sagði Einar Lúðvíksson í samtali við Veiðivísi í gær.

Önnur á sem er á höndum Einars er Þverá í Fljótshlíð en veiðin þar hefur að sama skapi verið mjög góð en holl sem lauk veiðum um helgina landaði 29 löxum og þar er einnig mjög góður gangur í göngum.  Aukið hefur verið við sleppingar í Þverá líka og ætti það að skila sér í aukinni laxgengd næsta sumar líka en eins ætti hlutfall tveggja ára laxa að aukast að sama skapi.  Örfá leyfi eru eftir í Þverá og Affall og þeir sem hafa hug á að komast þar að í haust þurfa að hafa hraðar hendur.  Upplýsingar um leyfin má finna á www.ranga.is.