Norðurá komin í 1.250 laxa

Heildarveiðin í Norðurá er komin í 1.250 laxa í sumar en þar hefur verið mikið líf og fjör við bakkann eins og í flestum ánum á vesturlandi.

Þegar veiðitölur sama tíma eru skoðaðar 10 ár aftur í tímann og ef við gefum okkur síðan að svipaður taktur verið í veiðinni má reikna með að áin teygji sig vel í 2.000 laxa í sumar og það er ekkert óhugsandi að hún fari yfir þá tölu.  Það sem hefur oft gert ánni erfitt fyrir í ágúst er lítið vatn en á þessu sumri er víst lítil hætta á því að nokkurt vatnsleysi eigi eftir að herja á ána.  Laxinn gekk framan af afar hægt upp á dal en hefur síðustu tvær vikurnar gengið upp af nokkrum krafti.  Samhliða þessu er ennþá að ganga lax svo það verður líklega gott framhald á veiðinni í Norðurá.  Það sem er að virka í ánni er það sama og víðast á þessum árstíma, litlar flugur.  Það sem hefur líka gert þetta skemmtilegt er að hitch virðist virka vel þrátt fyrir að það sé kalt í lofti en það er líklega einhver skemmtilegasta veiðiaðferð sem hægt er að nota á lax.