Síðasta holl með 85 laxa í Kjósinni

Það er góður gangur í laxveiðinni þessa dagana þrátt fyrir rok og rigningu upp á hvern dag en það virðist lítil áhrif hafa á tökuna.

Laxá í Kjós hefur átt mjög gott sumar það sem af er og er líklega að skríða yfir 300 laxa sem er mjög fín veiði miðað við árstíma og þær aðstæður sem hafa mætt veiðimönnum í sumar. Síðasta þriggja daga holl sem lauk veiðum 8. júlí var með 85 laxa sem er feyknagóð veiði og segir mikið til um það hversu fínar göngur hafa verið í Kjósinni síðustu daga.

Nú er vaxandi straumur og það hefur alltaf fylgt honum stærstu göngur sumarsins svo það verður gaman að fylgjast með gangi mála í Kjósinni í kjölfarið á honum. Veiðin í fyrra var 251 lax 12. júlí og veiðin nú því aðeins betri en hún var á sama tíma 2017. Heildarveiðin var þó ekki nema 860 laxar en þar spilaði inní að langvarandi þurrkar gerðu veiðimönnum afar erfitt fyrir og hefði verið betra vatn í fyrra hefði lokatalan verið mun hærri enda var nóg af laxi í ánni.