Þú getur eignast brúðkaupsföt Beckham-hjónanna

Hjónin Victoria og David Beckham hafa ákveðið að gefa fötin sem þau klæddust í konunglega brúðkaupinu til góðgerðamála. Áhugasamir geta boðið í fötin og rennur ágóðinn af sölunni óskiptur til eftirlifenda árásarinnar í Manchester á síðasta ári. Alls létust 22 í sjálfsmorðssprengjuárásinni sem framkvæmd var á tónleikum Ariana Grande í borginni.

Milljónir manna fylgdust með því þegar Harry Bretaprins gekk að eiga Meghan Markle í lok maí. Fjölmörg þekkt andlit fengu boðskort í athöfnina, þar með talin Beckham-hjónin. Þau eru af mörgum talin einhver stílhreinustu hjón veraldar og þóttu þau einkar flott í tauinu í athöfninni.

Því má ætla að töluverður peningur muni fást fyrir brúðkaupsfötin, sem rennur sem fyrr segir allur til góðgerða.

Hér að neðan má sjá fötin sem þau klæddust í brúðkaupinu, í færslu Victoriu um málið. Nánari upplýsingar má nálgast með því að smella hér.